Pavlodarda ınjenerlik jelilerdiń tsıfrlyq kartasy ázirlenip jatyr
PAVLODAR. KAZINFORM — Óńirlik geoaqparattyq júıeniń kezekshi kartasyna kiretin «Apattyq-jóndeý jumystary» modýliniń alǵashqy kezeńi iske asyryldy.
Bıyl oblys ortalyǵyndaǵy ınjenerlik jelilerdiń barlyǵy tsıfrlanady dep kútilip otyr. Osy maqsatta iske asa bastaǵan «Apattyq-jóndeý jumystary» modýliniń birinshi kezeńi ómirsheń etildi. Modýldiń jumys prıntsıpi — apat bolǵan nemese josparly jumystar júrgizilip jatqan jerlerdi jedel kórsetý, sondaı-aq, óshirý sebepteri men jumystardyń aıaqtalý merzimderi týraly habarlamalardy avtomatty túrde jiberý múmkindigin uıymdastyrý.
— Ekinshi Pavlodar shaǵyn aýdanyndaǵy 460 gektar aýmaqta ornalasqan ınjenerlik jeliler (elektrmen jáne jylýmen jabdyqtaý) boıynsha derekterdi jınaý jáne júıeleý boıynsha jumys oryndaldy. Bul derekterdiń negizinde apattyq-jóndeý jumystary kezinde kommýnıkatsııalardan ajyratylǵan ǵımarattardy kartada avtomatty túrde kórsetý protsesi ázirlendi. Sondaı-aq, 1414 SMS-habarlamasy arqyly halyqty aqparattandyrý múmkindigi iske asyryldy. Malaısary, Nurmaǵambetov, Qamzın jáne Jibek joly kósheleriniń arasynda ornalasqan 49 kósheniń jelileri tsıfrlandy. Sonymen qatar, turǵynjaı jáne ózge de ǵımarattar tsıfrlandy. Elektr energııasyn tutyný boıynsha 4308 abonent jáne jylýdy tutyný boıynsha 1368 abonent anyqtaldy, — dep habarlady óńir ákiminiń baspasóz qyzmetinen.
Jobany iske asyrý elektrmen jabdyqtaý, jylýmen jabdyqtaý, sýmen jabdyqtaý jáne káriz jelileriniń óshirilgen aımaqtaryn onlaın rejımde tirkeýge múmkindik beredi jáne kommýnaldyq qyzmetterdiń jedel áreket etýin qamtamasyz etedi. Interaktıvti karta jańa jylý berý maýsymy bastalǵanǵa deıin iske qosylýy kerek.
Eske sala keteıik, Pavlodarda qoqysty suryptap jınaǵan turǵyndar kommýnaldyq qyzmetke az tóleýi múmkin.