Pavlodarda ınvestor quqyǵy qorǵaldy: zaýyt qurylysyna kedergi bolǵan másele sheshildi
ASTANA. KAZINFORM - Pavlodar qalasynyń prokýratýrasy Bas prokýratýrasynyń Investorlardyń quqyqtaryn qorǵaý jónindegi komıtetimen birlesip, bentonıt sazy men sılıkagel negizinde toltyrǵyshtar óndiretin zaýyt salý boıynsha ınvestıtsııalyq jobany iske asyryp jatqan «1G KAZAKHSTAN» JShS-niń quqyqtaryn qalpyna keltirdi.
QR Bas prokýratýrasy baspasóz qyzmetiniń habarlaýynsha, ótinishti qaraý barysynda ınvestordyń ákimshilik kedergilerge tap bolǵany anyqtaldy: ýákiletti organ buryn berilgen ruqsat qujattaryn keri qaıtaryp alǵan, bul jobany iske asyrýǵa eleýli táýekelder týǵyzǵan.
Atalǵan jaǵdaı óndiristi iske qosý merzimderiniń buzylýyna, kredıtorlar aldyndaǵy qarjylyq mindettemelerdiń týyndaýyna jáne ınvestıtsııalyq jobanyń toqtap qalýyna ákelýi múmkin edi.
Prokýrorlyq qadaǵalaý sharalarynyń nátıjesinde ınvestordyń quqyqtary qalpyna keltirilip, buryn berilgen ruqsat qujattary qaıtaryldy.
Sonymen qatar, ınvestıtsııalyq joba Investıtsııalyq shtabtyń otyrysynda qaralyp, óńirlik ınvestıtsııalyq jobalar pýlyna engizildi. Bul jobany odan ári súıemeldeýge jáne týyndaıtyn máselelerdi jedel sheshýge múmkindik beredi.
Pavlodar oblysynyń prokýratýrasy ınvestorlardyń quqyqtaryn qorǵaý jáne óńirdegi bıznes úshin ákimshilik kedergilerdi azaıtý baǵytyndaǵy jumystardy jalǵastyrýda.
-Ákimshilik kedergilerge, quqyqtarynyń buzylýyna nemese kásipkerlik qyzmetke zańsyz aralasýǵa tap bolǵan ınvestorlar +7 (701) 578-47-15 telefony arqyly nemese 115 Call-ortalyǵyna habarlasa alady, -delingen habarlamada.
Osyǵan deıin Abaı oblysynda prokýratýranyń yqpalymen 12 mlrd teńgelik jobanyń máselesi sheshilgeni týraly jazdyq.
