Pavlodarda ınsýltten kóz jumǵan kóp balaly ana úsh adamnyń ómirin qutqardy
ASTANA. QazAqparat - Pavlodarda uzaq ýaqyt sozylmaly aýrýdan zardap shegip, ınsýltten kóz jumǵan 37 jastaǵy áıel adamnyń aǵzalary úsh adamǵa berildi.
Bul týraly búgin № 1 qalalyq aýrýhanada ótken baspasóz máslıhatynda oblystaǵy transplantologııa boıynsha óńirlik úılestirýshi Dmıtrıı Poterebýh málim etti dep habarlaıdy pavlodarnews.kz.
«Birneshe adamǵa ómir syılaǵan donordyń jasy 37-de. Tórt balanyń anasy. Ol bizdiń aýrýhanaǵa 17 sáýir kúni sanavıatsııa arqyly aýdannan jetkizilgen bolatyn. Arterıalyq gıpertenzııasy bar sozylmaly gemotologııalyq derttiń saldarynan ınsýlt alyp, mıyna qan quıylǵan. Aq jeleńdiler naýqastyń ómiri úshin barynsha kúresti. Tipti, basyna ota da jasady. Ókinishke oraı, eshbir nátıje bolmady. 19 sáýir kúni saǵat segizde arnaıy komıssııa naýqastyń mıy tirshilik belgisin toqtatqanyn, ıaǵnı bıologııalyq ólim tirkelgenin anyqtady. Budan ári týystarymen túsindirý jumystary júrgizilip, olar bir táýliktiń ishinde kelisimderin berdi», - deıdi Dmıtrıı Poterebýh.
Aq jeleńdiniń aıtýynsha, sol kúni respýblıkalyq sanıtarlyq avıatsııa tarapynan quramynda úsh ortalyqtyń dárigerleri bar brıgada ushaqpen kelip, marqumnyń júregi, eki búıregi, kóziniń aǵy jáne baýyry Astanaǵa jetkizilgen. Nátıjesinde astanalyq 13 jastaǵy bala men qaraǵandylyq 53 jastaǵy er adamǵa eki búıregi jáne elordalyq 33 jastaǵy áıelge júregi berilgen. - Bul óte kúrdeli jumys. Oǵan donorlyq statsıonar, respýblıkalyq ortalyq jáne kólik usynatyn sanavıatsııa qatysady. Sebebi shekteýli ýaqyttyń ishinde aǵzany basqa adamǵa tabystap úlgerý qajet. Qazirgi tańda aǵzalardy qabyldaǵan jandardyń barlyǵy qarqyndy terapııa palatasynda. Bir aptadaı dárigerlerdiń baqylaýynda bolady, - deıdi Dmıtrıı Poterebýh.
Pavlodar qalasy № 1 qalalyq aýrýhananyń bas dárigeriniń orynbasary Ermek Kúshikovtiń aıtýynsha, elimizde donorlyq aǵzany almastyrýǵa muqtaj adamdardyń sany - 3414. Pavlodar oblysynda 95 adam transplantatsııany qajet etedi. Onyń úsheýi - eńbekke jaramdy jastar men balalar. Al, kútý paraǵynda 85 adam búırek qajet etse, 10 adamnyń baýyryn almastyrý kerek.
Aıta keterligi, bul - óńirimizde donor bolý boıynsha besinshi jaǵdaı bolsa, № 1 qalalyq aýrýhana bazasynda oryn alǵan tórtinshi jaıt. Alǵash ret operatsııa aqpan aıynda, keıingi eki ota qyrkúıek aıynda jasalǵan bolatyn.
