Pavlodarda ımporttyń jergilikti ónimdi yǵystyrmaýyna qarsy sharalar pysyqtalýda
PAVLODAR. KAZINFORM - Óńir Reseımen shekarada ornalasqandyqtan kórshi elden keletin keıbir ónimder otandyq kásipkerlerdiń bıznesine aıtarlyqtaı tusaý bolyp otyr. Oblys bıligi máseleni sheshý boıynsha keshendi sheshimderdi, sonyń ishinde Úkimetpen birqatar negizgi aspektilerdi pysyqtap jatyrmyz dep málimdedi.
Bul týraly Pavlodar oblysynyń ákimi Asaıyn Baıhanov pen «Atameken» Ulttyq kásipkerler palatasynyń tóraǵasy Raıymbek Batalovtyń jergilikti kásipkerlermen kezdesýinde aıtyldy.
- Pavlodar oblysy shekaraǵa jaqyn ornalasqan óńir, soǵan oraı biz ımporttyq ónimderdiń otandyq taýarlardy naryqtan yǵystyrmaýyna erekshe kóńil bólýimiz kerek. Qazir Reseıden arzan sút ónimderin jetkizýdiń kúrt ósýine baılanysty jergilikti sút óndirýshilerdiń ónimderin satýda qıyndyqtar týyndady. Bul jergilikti másele emes jáne barlyq derlik shekaralas aımaqtarǵa áserin tıgizedi. Másele keshendi sheshimderdi, sonyń ishinde Úkimetpen birqatar negizgi aspektilerdi pysyqtaýdy talap etedi jáne biz qazir osymen belsendi aınalysýdamyz, - dedi óńir ákimi.
Kásipkerler mıkro jáne shaǵyn bıznes ókilderiniń quzyretterin damytýǵa, áıelder kásipkerligin qoldaýǵa, logıstıkaǵa, ınfraqurylymdy damytýǵa qatysty máselelerdi kóterdi.
Aıtyp óteıik, Pavlodar oblysynda 140 myńnan astam adam shaǵyn jáne orta bıznes salasynda, sondaı-aq taǵy 80 myń adam ónerkásip salasynda eńbek etip jatyr. «Bıznes-nesıeler boıynsha paıyzdyq mólsherlemeni sýbsıdııalaý» baǵdarlamasy boıynsha sońǵy úsh jylda qarjylandyrý kólemi 2,5 esege - 12 mlrd teńgege ósti.
Jas kásipkerlerge jeńildetilgen nesıe berý kólemi 820 mln. teńgege jetti. Tek bir jyldyń ishinde ShOB ónimderiniń óndirisi 173 mlrd teńgege ulǵaıdy. Óńirde ınvestıtsııalyq shtab belsendi jumys isteıdi. Negizgi ınvestıtsııalyq jobalar pýlynda - 10 myńnan astam jumys ornyn qurýǵa múmkindik beretin 2,1 trln teńgege 91 joba bar.
Eske sala keteıik, buǵan deıin pavlodarlyq zaýyttar jergilikti sharýashylyqtardan sút satyp alýǵa lımıt engizýi múmkin ekenin, sebebi, Reseıdiń shekaralas aýmaqtarynan otandyq kásiporyndarǵa arzan shıkizat usynyp otyrǵandar baryn jazǵan edik.
Petropavldyq zaýyt pavlodarlyq fermerlerdiń sútin satyp alýǵa nıettenip otyr.
