Pavlodarda halyqqa keńes beretin jyljymaly ortalyq jumysyn bastady
PAVLODAR. QazAqparat - Pavlodarda halyqqa áleýmettik suraqtarǵa qatysty keńes beretin jyljymaly mobıldi ortalyq jumysyn bastady. Bul týraly qala ákimi Ánýar Kúmpekeev Feısbýktegi paraqshasynda jazdy, dep habarlaıdy QazAqparat tilshisi.
«Meniń tapsyrmam boıynsha Pavlodar qalasynda halyqty áleýmettik qoldaý jónindegi «Mobıldi ortalyq» óz jumysyn bastady. Jyljymaly pýnktte jumyspen qamtý, áleýmettik baǵdarlamalar, bilim berý jáne qarjy basqarmalary mamandarynyń konsýltatsııalary qarastyrylǵan», - dep jazdy qala ákimi.
Ortalyq ár sársenbi, juma jáne senbi kúnderi qalanyń qoǵamdyq oryndary men Pavlodarǵa jaqyn mańdaǵy aýyldyq aımaqtarda jumys isteıdi.
«Búgingi kúni «Mobıldi ortalyq» qyzmeti 140-tan astam adamǵa qol ushyn sozdy, onyń ishinde 25 adam jumysqa ornalastyryldy. Kelýshilerdiń barlyǵyna keńes beriledi. Endi pavlodarlyqtar úshin jumysqa ornalasý, turǵyn úı kezegine turý jáne áleýmettik tólemderdi rásimdeýdegi qajetti qyzmetterdiń qoljetimdiligi arta tústi. ıAǵnı turǵyndar ózderin qyzyqtyratyn aqparatty jyldam ári tıimdi alýy úshin biz osy jobany ázirledik», - deıdi Á. Kúmpekeev.
Onyń aıtýynsha, atalǵan baǵyttaǵy jumystar arqyly ákimdiktiń áleýmettik qyzmetteri halyqqa odan da jaqyndaı túsedi.
