Pavlodarda halyqqa biryńǵaı qyzmet kórsetý ortalyǵy ashylady
ASTANA. QazAqparat - Pavlodarda jemqorlyqpen kúres boıynsha tıimdi ádis engizilýde, dep habarlaıdy pavlodarnews.kz.
Oblys ortalyǵynda qosymsha halyqqa qyzmet kórsetý ortalyǵyn salýdyń ornyna biryńǵaı halyqqa qyzmet kórsetý ortalyǵyn ashý týraly sheshim qabyldandy. Mundaı usynys jýyrda memlekettik qyzmet sapasyn arttyrý jáne jemqorlyqqa qarsy kúres boıynsha ótken kóshpeli vedomstvoaralyq jıyn barysynda usynylǵan.
Osy jıynda «Azamattarǵa arnalǵan úkimet» memlekettik korporatsııanyń qyzmetin úılestirý jónindegi dırektory Shoqan Ábdilmanov elektrondyq úkimetti ońtaılandyrý týraly pikirin bildirgen.
«Bizge kóptegen bólimderde avtomattandyrý joq ekenine eskertý jasaldy», - dedi qala ákimi Nurjan Áshimbetov.
«Barlyǵy kóshirilgen, skanerden ótkizilgen bolýy tıis jáne serverde saqtalýy kerek. Osyǵan qaraı qujattardy avtomattandyrý bólimderine qarjy bóletin bolamyz».
Qala basshysynyń aıtýynsha, Krıvenko kóshesindegi bes qabatty ǵımaratta kelesi jyly úlken ortalyq ashylady. Bul maqsatta qalalyq bıýdjetten shamamen 400 mln teńge qarastyrylǵan. Qazirgi tańda munda negizgi memlekettik mekemeler ornalasqan. Kúrdeli jóndeý jumystary júrgizilgennen keıin birinshi qabat biryńǵaı HQKO-na beriledi.
«Bizdiń qyzmetkerler qandaı da bir qyzmet alýǵa kelgen azamattardy qabyldaıdy. Ol arnaıy úshin terezeler nemese ashyq qabyldaý formasy bolady. Qalalyq keńes memlekettik saraptamany alýdy jáne bul jobany qarastyrýdy jeltoqsan aıyna josparlap otyr»,-dedi qala basshysy.
