Pavlodarda grant ıelengen 8 jaýynger ýnıversıtette tegin oqıdy
PAVLODAR. KAZINFORM — «Shyǵys» óńirlik qolbasshylyǵyna qarasty Pavlodar qalasyndaǵy 5512 áskerı bóliminiń merzimdi áskerı qyzmetshileri elimizdiń birqatar joǵary oqý oryndaryna túsý granttaryna ıe boldy.
Bul týraly «Shyǵys» óńirlik qolbasshylyǵynyń baspasóz qyzmetinen habarlandy.
«Pavlodardaǵy 5512 áskerı bóliminde jalpy sany 8 sarbaz joǵary oqý oryndaryna joldama aldy. Jaýyngerlerge „Áskerı mindettiler 2.0“ platformasy arqyly joǵary bilim alýdyń taptyrmas múmkindigine berilip otyr. Avtomatty túrde júıelengen baǵdarlamada sarbazdyń áskerge kelgen kúnnen bastap qyzmet atqarý kezindegi baǵalary, áskerı daıyndyǵy basty ólshem retinde baǵalanady. Budan bólek, áskerı ómirdegi jaýyngerlik daǵdylar, túrli is-sharalarǵa belsendilikpen qatysýy da eskeriledi» delingen aqparatta.
Bilim serıfıkatyna ıe bolǵandardyń biri — Maksım Shısh.
Almaty oblysynan shaqyrtylǵan azamat aldaǵy ýaqytta Shymkent qalasyndaǵy Ońtústik Qazaqstan pedagogıkalyq ýnıversıtetinde bilim almaq.
«Áskerge deıin Almaty qalasyndaǵy gýmanıtarlyq jáne tehnıkalyq kolledjden orta bilim aldym. Aldaǵy maqsatym joǵary bilim alý bolatyn. Sondyqtan Ulttyq birińǵaı testileýge jatpaı-turmaı eki-úsh aı daıyndalý qajet dep ýaıymdap júrgenmin. Ulttyq ulan qatarynda grant ıesi atanýym men úshin tosyn syı boldy. Óıtkeni, bir oqpen eki qoıandy atqandaı sezim keship turmyn. Qýanyshymda shek joq», — deıdi qatardaǵy jaýynger Maksım Shısh.
