Pavlodarda GAZ-53 kóligi Kamazǵa soǵylyp, eki adam qaza tapty
PAVLODAR. KAZINFORM - «Omby-Maıqapshaǵaı» avtojolynda GAZ-53 kóligi jol shetinde toqtap turǵan júk kóligine soǵylǵan. Oqıǵa saldarynan júrgizýshi men jolaýshy mert boldy.
- 30 qyrkúıek kúni «Omby-Maıqapshaǵaı» trassasynyń Chernoretsk aýylynan 5 shaqyrym jerde «GAZ-53» avtokóliginiń júrgizýshisi jol qaýipsizdigin qamtamasyz etpeı, jol jıeginde turǵan «KamAZ» avtokóligimen soqtyǵysqan. Apattan GAZ-53 júrgizýshisi men jolaýshy kóz jumdy. Taǵy bir jolaýshy jaraqat aldy, - dep habarlady óńirlik polıtsııa departamentiniń baspasóz qyzmetinen.
Tártip saqshylary qaıǵyly jol-kólik oqıǵasy boıynsha qylmystyq is qozǵalǵanyn málim etti. Jaraqat alǵan jolaýshy №1 Pavlodar qalalyq aýrýhanasyna jetkizilgen.
Polıtsııa departamenti mundaı jazataıym oqıǵalardyń aldyn alý úshin jol qozǵalysyna qatysýshylarǵa qozǵalys erejelerin qatań saqtaýdy, ásirese kólik qozǵalysy qarqyndy ýchaskelerde abaı bolý kerektigin eskertedi. Sondaı-aq kólik quraldarynyń tehnıkalyq jaǵdaıyn baqylap otyrý da mańyzdy.
Eske sala keteıik, Pavlodar-Astana avtobanynda jol-kólik apatynan bes adam kóz jumdy.