Pavlodarda ǵaryshtyq monıtorıng derekteri boıynsha 186 zańsyz qoqys úıindisi joıyldy

PAVLODAR. KAZINFORM - Búgingi tańda Pavlodar oblysynda sanıtarııalyq jáne qurylys normalaryna sáıkes kelmeıtin, ekologııalyq ruqsaty joq 316 qatty turmystyq qaldyqtar polıgony bar. Jańadan paıda bolǵan zańsyz qoqys úıindileri «Qazaqstan Ǵarysh Sapary» ǵaryshtyq monıtorıngi arqyly anyqtalady.

- Jyl basynan beri oblysta ruqsat etilmegen 205 qoqys polıgony anyqtaldy. Qazirdiń ózinde ruqsat etilmegen 186 qoqys polıgony joıylǵan. Bul - anyqtalǵan nysandardyń jalpy sanynyń 93 paıyzy, - deıdi Pavlodar oblysy ekologııa departamenti basshysynyń orynbasary Áset Syzdyqov.

Mamandar Ekologııalyq kodeks talaptaryn oryndamaǵan jergilikti atqarýshy organdardyń ákimshilik jaýapkershilikke tartylatynyn aıtady. Bıyl júrgizilgen tekserýlerdiń qorytyndysy boıynsha 8 memlekettik mekeme 1,4 mln teńge, sondaı-aq 5 laýazymdy tulǵa 149 myń teńge kóleminde aıyppul tólegen.

Eske sala keteıik, Pavlodarlyq kásiporyn ekologııalyq talaptardy buzǵany úshin iri kólemde aıyppul tóledi.