Pavlodarda Eýropadan ınternet arqyly esirtki saýdalaǵandar ustaldy
PAVLODAR. QazAqparat - Pavlodarda Eýropadan ınternet dúkeni arqyly esirtki tasydy degen kúdikpen eki adam qamaýǵa alyndy. Bul týraly oblystyq polıtsııa departamenti esirtkige qarsy kúres basqarmasynyń basshysy, polıtsııa podpolkovnıgi Balǵabaı Qaparov málim etti, dep habarlaıdy pavlodarnews.kz.
«Basqarma qyzmetkerleri esirtki saýdasymen aınalysqan degen kúdikpen toptyń múshelerin qolǵa túsirdi. Olar Eýropadan sıntetıkalyq esirtkilerdi tasyǵan. Ustalǵandar 20-30 jas aralyǵyndaǵy eki azamat. Esirtkini kúdiktiler saıttarǵa jarnama berý arqyly satyp otyrǵan. Tintý barysynda 2 keliden astam, quny 12 mıllıon teńgege jýyqtaıtyn LSD (esýastandyrǵysh zat), ekstazı, spice sııaqty 1500 bir rettik mólsherdegi sıntetıkalyq esirtki tárkilendi», - dedi Balǵabaı Qaparov. 
Basqarma basshysynyń aıtýynsha, esirtkini kúdiktiler Eýropadan poshta arqyly sálemdeme retinde ákelip otyrǵan. Osy top bir jyldan astam ýaqyt baqylaýǵa alynyp, tekseristik satyp alýlar uıymdastyrylǵan. Olardyń ózderiniń ınternet dúkenderi bar. Sol arqyly saıttarǵa jarnama berip otyrǵan.
Qazirgi kezde QR QK-niń 297-babyna sáıkes sotqa deıingi tergeý amaldary júrgizilýde. Atalǵan bap boıynsha 15-20 jylǵa deıin bas bostandyǵynan aıyrý sanktsııasy qarastyrylǵan. Kúdiktiler Pavlodar qalasy polıtsııa basqarmasynyń ýaqytsha ustaý oqshaýlaǵyshyna qamaýǵa alyndy.
Aıta keteıik, jyl basynan beri óńirde esirtkige qatysty 75 qylmys tirkelip, 400 keliden astam esirtki túrleri tárkilendi. Sondaı-aq, 30 esirtki saýdalaý núktesi anyqtalyp, 32 adam ustalǵan.
