Pavlodarda et óńdeıtin jańa kásiporyndar salynady

PAVLODAR. KAZINFORM — Ertis-Baıan óńiriniń aýdandarynda qaıta óńdeý salasy kenjelep tur. Ásirese, Baıanaýyl, Ertis aýdandarynda aýyl sharýashylyǵy shıkizatyn óńdep, daıyn taýar shyǵaratyn kásiporyndar óte az.

Óńdeý kásiporyndaryna suranyp turǵan óńirdiń biri — Baıanaýyl aýdany. Mundaǵy metallýrgııalyq, kómir óndirisi salalaryn aıtpaǵannyń ózinde, mal ónimderin qaıta óńdeý sektory damymaı qalǵan. Aýdanda shamamen 100 myńǵa tarta qara mal, 100 myńnyń ústinde qoı-eshki, 70 myńdaı jylqy bar.

Pavlodar oblysynyń ákimi Asaıyn Baıhanovtyń aıtýynsha, Baıanaýylda jáne Ertis aýdanynda aldaǵy jyldary et óńdeý kásiporyndary salynady dep josparlanǵan.

— Et óńdeý kombınattary aýmaqtardaǵy maldyń sanyna qaraı qurylatyn bolady. Máselen, elimizdiń ońtústik óńirleri úshin kúnine 100 maldyń etin óńdeıtin kásiporyn ortasha bolyp eseptelse, bizdiń aýdandar úshin ol eń joǵary norma bolyp shyǵýy múmkin. Aldaǵy jyldary qos aýdanda ınvestıtsııalyq quny 5,5 mlrd teńge turatyn eki et kombınatyn salamyz degen jospar tur. Bul jerde «QazAgronyń» kómegine súıenemiz. Infraqurylymy jergilikti bıýdjet esebinen tartylady. Bul kásiporyndar aımaqtyń ekonomıkasyna eleýli tabys ákelýi tıis, — dep habarlady Kazinform tilshisine óńir basshysy Asaıyn Baıhanov.

Eske sala keteıik, elimizde 5 jyl ishinde aýyl sharýashylyǵy ónimderin qaıta óńdeýdi damytýǵa 372 mlrd teńge baǵyttalady.