Pavlodarda Estaı Berkimbaıulynyń eskertkish qoıyldy

Músin qoladan quıylǵan, bıiktigi 4 metr, tuǵyr tasy granıtten jasalǵan.

Sharaǵa Estaı aqynnyń urpaqtary men ánshiniń ómiri men shyǵarmashylyǵyn zertteýshiler, ánderin nasıhattaýshylar, zııaly qaýym ókilderi jáne eskertkishtiń avtory QR Sýretshiler Odaǵynyń múshesi, músinshi Azat Baıarlın, QR eńbek sińirgen qaıratkeri, elimizdiń estrada juldyzy Merýet Túsipbaeva, opera ánshisi, jerlesimiz Marııa Mýdrıak, QR eńbek sińirgen qaıratkeri Erbol Aıtbaev qatysty.

- Búgin barshamyz úshin erekshe oqıǵa. Ulystyń uly kúni Naýryz meıramynda qazaqtyń birtýar tulǵasy, ánshi, aqyn, Estaı Berkimbaıulynyń eskertkishi oblys ortalyǵynda ornatylyp otyr. Qazaq dalasyn ánge bólegen Estaı Berkimbaıulynyń qazaq óneri men mádenıetinen alar orny erekshe. Kompozıtordyń mahabbat sımvolyna aınalǵan «Qusnı-Qorlan» ánin búkil álem baǵalap otyr. Osyndaı asyl mura qaldyrǵan ánshiniń esimi halyq jadynda máńgi qalatyny sózsiz. Naýryz merekesi qarsańynda eskertkishtiń ashylýy - ulylarǵa kórsetilgen taǵzym jáne Táýelsizdigimizdiń 30 jyldyǵyna tartylǵan syı. Sizderge jáne jaqyndaryńyzǵa zor densaýlyq, mol baqyt, januıalaryńyzǵa bereke-birlik tileımin! - dep aımaq basshysy Ábilqaıyr Sqaqov jınalǵandardy Naýryz merekesimen quttyqtady.

Memlekettik Prezıdent stıpendııasynyń ıegeri, respýblıkalyq Estaı atyndaǵy ánshiler baıqaýynyń bas júldegeri Medǵat Manapov Estaıdyń «Jaı qońyr» ánin oryndady.

QR Parlamenti Senat depýtaty Altynbek Nuhuly Estaı eskertkishiniń ashylýymen depýtattardyń atynan izgi tilegin bildirdi.

- Ulystyń uly kúni ulttyq mýzykamyzdyń ushary bıik shyńyna shyqqan, talant ıesi, Qazaqstan kompozıtorlar Odaǵynyń eń alǵashqy múshesiniń biri, tarıhı tulǵa Estaı Berkimbaıulynyń eskertkishiniń ashylýy saltanatynda turmyz. Dala akademııasynyń asyldary Birjan sal men Aqan seriden tálim alǵan Estaı nebári 20 jasynda «Qorlan» ánimen klassıkalyq bıikke kóterildi. Bul ánniń qudireti sondaı, aqıyq aqyndarymyz Qasym, Muzafar men Muhtar poemalar arnasa, belgili kompozıtorlar Brýsılovskıı men Muhamedjanov operada sharyqtatyp, álemdi tánti etti. Endeshe el maqtanyshy Estaıdyń tabıǵı talanatyna qalaı tańdanbasqa? – dep atap ótti Altynbek Nuhuly.

Sondaı-qa Estaı Berkimbaıulynyń urpaǵy, «Egemen Qazaqstan» gazetiniń jýrnalısti Farhat Ámirenov eskertkish qoıýǵa bastama kótergen abzal azamattarǵa, ony qoldap, qýattaǵan oblys basshylyǵyna jáne ıdeıany júze asyrǵan músinshi Azat Baıarlınge ánshi áýletiniń atynan alǵys aıtty.

- 1946 jyldyń naýryz aıynda Estaı Berkimbaıuly ómirden ozdy. Osydan 75 jyl ótkende ánshi babamyz eńseli eskertkishke aınalyp, aramyzǵa oralyp otyr. Estaıdy Estaı etken – onyń ánderi. Sol ánderimen ol búginge jetti. Onyń ánderi talaı ónerpazdyń baǵyn ashyp, álemge tanytty. Estaıdyń ánderi birinshi kezekte óziniń týǵan jerinde shyrqalýy tıis. Qurmetti ákim! Osydan birneshe jyl buryn Pavlodarda Estaı atyndaǵy respýblıkalyq dástúrli ánder konkýrsy ótetin. Qazaqstandaǵy talantty dástúrli ánshilerdiń basyn biriktiretin, óńir jurtshylyǵy asyǵa kútetin aıtýly shara edi. Sońǵy jyldary osy bir tamasha bastama belgili bir sebeptermen úzilip qaldy. Sizden Estaı atyndaǵy osy konkýrsty qaıtadan jandandyrýdy, eki jylda bir ret oblys kóleminde ótkiziletin sharalardyń tizimine engizýdi suraıyz, - dedi Farhat Ámirenov.

Sondaı-aq ol oblys basshylyǵyna Estaı týraly málimetterdi bir kitapqa jınastyryp, Estaı entsıklopedııasyn shyǵarýdy jáne «Estaı men Qorlannyń ǵashyqtyq hıkaıasy» týraly kórkem fılm túsirýdi usyndy.

Aıta keteıik, 2019 jyly oblystyq ardagerler keńesiniń ókilderinen jáne zııaly qaýym men aqsaqaldardyń atynan Pavlodar qalasynda Estaı Berkimbaevtyń eskertkishin ornatý týraly usynys hat túsken.
Eske sala keteıik, pavlodarlyq ónertanýshy Estaıdyń «Qusnı – Qorlan» ániniń tanymaldylyǵynyń qupııasy nede ekenin aıtyp berdi. «Qusnı – Qorlan» týyndysynyń ánshiler oryndaýyndaǵy 18 túri bir beınejazbaǵa jınastyrylǵan.
Pavlodar mýzeıinde ańyzǵa aınalǵan Estaıdyń mýzykalyq qory saqtaýly.