Pavlodarda Estaı aqynǵa eskertkish ornatylady
Atalǵan məsele oblys əkiminiń orynbasary Ashat Oralovtyń qatysýymen ótken «Rýhanı jańǵyrý» baǵdarlamasy jónindegi saraptaý keńesiniń kezekti otyrysynda aıtyldy. Jıyn kezinde óńirimizdegi qala men aýdan ókilderi óz jobalarymen tanystyrdy. Oblys əkiminiń orynbasary bul məselede sannyń emes, sapanyń mańyzdy ekendigin eskertti.
«Sońǵy eki jylda biraz jobalar iske asyryldy. Biraq, bizge jobalardyń sany emes, sapasy kerek. Óńirimizdi úlgi etetin naqty jobalar kútemiz. Bizde ózge oblystarǵa úlgi bolý úshin barlyq jaǵdaı jasalǵan», - deıdi Ashat Oralov.
Oblys əkiminiń orynbasary Saıan Muqanov «Rýhanı jańǵyrý» baǵdarlamasy aıasynda bıyl qalada júzege asyrylatyn jobalardy sanamalap shyqty. Aıtalyq, osy jyly aqyn Estaı Berkimbaıulynyń eskertkishi men mýzeıi ashylmaq. Eskertkish Estaı atyndaǵy mədenıet saraıynyń mańynda boı kóterse, mýzeı bolsa, saraı ishinde ashylady. Joba quny 35 mıllıon teńge. Ony júzege asyrý demeýshiler tarapynan qarjylandyrylmaq.
Taǵy bir eskertkish Ekibastuzda boı kótermek. Qazaqtyń uly qolbasshysy Baýyrjan Momyshulyna arnalǵan monýment Ekibastuzdyń ortalyq kósheleriniń birinde jyldyń sońyna deıin salynady.
Qalalyq ishki saıasat bóliminiń basshysy Zınaıda Muhametjanovanyń aıtýynsha, Stroıtelnaıa kóshesiniń ataýy ózgerip, oǵan batyrdyń aty beriledi.
Kenshiler qalasynda júzege asyrylatyn taǵy bir tyń joba - Səbıler alleıasy. Oǵan səıkes, Ekibastuzda týǵan ərbir nəresteniń qurmetine ata-anasy belgilengen jerge bir túp aǵash otyrǵyzady. Maı aýdany bolsa, «Rýhanı jańǵyrý» aıasynda «Alma baǵy» jobasyn usyndy. Ol boıynsha aýdan ortalyǵynda tamshylap sýarý təsilimen alma aǵashyn egip, ónim alyp, jastardy eńbekke baýlý kózdeledi.
