Pavlodarda eskertkishterge QR-kodtar ornatylýda
ASTANA. QazAqparat - Skanerleý kezindegi jyldam áreket etý kody (nemese QR-kod) bar alǵashqy taqtaısha Pavlodar oblysy mádenıet, arhıvter jáne qujattama basqarmasy ǵımaratynda paıda boldy. Atalmysh kod arqyly nysan jaıly úsh tilde aqparat alýǵa bolady, dep habarlaıdy pavlodarnews.kz.
«Rýhanı janǵyrý» baǵdarlamasy aıasynda QR-kodtardy engizý jobasyn Pavlodar oblysy mádenıet, arhıvter jáne qujattama basqarmasy júzege asyrdy. Mádenıet salasynyń qyzmetkerleri tarıhı jáne arhıtektýralyq nysandar jaıly aqparattardy oblys turǵyndaryna osylaısha qol jetimdi etpek.
«Barlyǵy óte ońaı: bolashaqta ár eskertkishke jyldam áser etý kodtary bar osyndaı taqtaıshalar ornatylady», - deıdi basqarma basshysy Ardaq Raıymbekov.
«Smartfondardaǵy arnaıy qosymsha arqyly kez kelgen óńir turǵyny ózine qajetti maǵlumatty ala alady. Aqparat latyn qaripinde úsh tilde usynylady. Bul joba arqyly pavlodarlyqtar ózderiniń óńiriniń tarıhymen jaqynyraq tanysady degen senimdemin»
Aldyńǵy kezekte arnaıy taqtaıshalardy tarıhı jáne arhıtektýralyq mańyzy bar 45 ǵımaratqa ornalastyrady. Bul jumystar jyl sońyna deıin aıaqtalady. Kelesi jyly QR-kodtary bar shaǵyn taqtaıshalar barlyq eskerkishterge qoıylady.
Aıta keteıik, Pavlodar oblysynda 283 eskertkish tirkelgen.
