Pavlodarda esirtki tasymaldaǵan er adam ustaldy
«Pavlodar oblysy ІІD Esirtki qylmysyna qarsy kúres bólimshesiniń jedel qyzmetkerleri aqsha tabý maqsatynda zańsyz zattardy satyp alýshymen tikeleı kezdespeıtin tásilmen taratqan 32 jastaǵy narkokýrerdi ustady», - dep habarlady tilshilerge Pavlodar oblystyq polıtsııa departamentinen.
Tártip saqshylary er adamnyń turǵylyqty jerin tekserý kezinde salmaǵy 700 gramnan asatyn krıstaldy zattardy anyqtady, dep atap ótti vedomstvodan. Keıinirek qoımadan taǵy 390 gramm esirtki tárkilengen.
«Saraptama tárkilengen zat jalpy salmaǵy bir keliden asatyn sıntetıkalyq esirtki ekenin anyqtady», - dep málimdedi Pavlodar oblysy polıtsııa departamentiniń bastyǵy Vasılıı Sklıar.
Vedomstvo málimetinshe, er adam aımaqtyq kýrer jáne esirtki qoımasynyń oraýshysy bolǵan. Ol asa iri kólemdegi esirtki zattaryn qabyldap, keıin jasyryn oryndarǵa orap salyp júrgen. Tárkilengen esirtkiniń bir kelisi 5 myńnan astam bir rettik dozany quraıdy.
«Atalǵan fakti boıynsha QR Qylmystyq kodeksi 297-babynyń 3-bólimi (Esirtki, psıhotropty nemese olarǵa uqsas zattardy zańsyz daıyndaý, óńdeý, satyp alý, saqtaý, tasymaldaý) boıynsha sotqa deıingi tergeý amaldary júrgizilýde.
Kúdikti Pavlodar qalasynyń ýaqytsha ustaý ızolıatoryna qamaldy», - dep tolyqtyrdy departamentten.
Naýryz aıynda polıtsııa qalada esirtki satýshy stýdentti ustady .
Qylmyskerdi ustaý vıdeosy Pavlodar oblystyq polıtsııa departamentiniń saıtynda jarııalanǵan.