Pavlodarda Ertis ózeninen ótetin úlken kópir salynady – ákim ýádesi
ASTANA. KAZINFORM – Bıyl Pavlodar oblysynyń 2021-2025 jyldarǵa arnalǵan damý jospary aıasynda Ertis ózeninen ótetin úlken kópir salynady, odan bólek 30 feldsherlik-akýsherlik pýnkti ashylmaq. Oblys ákimi Asaıyn Baıhanov «Jibek joly» telearnasyndaǵy «Ýáde» baǵdarlamasynda suhbat berip, óńir jaǵdaıymen tanystyrdy.
Óńirdegi sý tasqyny jaǵdaıy
«Búginde jaǵdaı turaqtaldy, qarǵyn sý ótti. Prezıdenttiń tapsyrmasyna sáıkes, sý tasqynynan kelgen zalal tólemaqysyn ótedik. Jalpy sany 124 jer úı zardap shekti, onyń ishinde 5 úı apatty jaǵdaıda dep belgilendi, olardyń qurylysy bastaldy, maýsymnyń aıaǵynda bitedi dep kózdep otyrmyz. Tótemaqy tolyqtaı demeýshilerdiń esebinen óteldi. Tasqyn sýdyń ekinshi kezeńi kútilýde, ıaǵnı Ertis ózeniniń kóterilýi. Qaýipti tómen deńgeıde dep sanaımyz, daıyndyq jumystary júrip jatyr. Óńirde adam jáne mal shyǵyny bolǵan joq», - dedi Asaıyn Baıhanov.
Pavlodar oblysynyń 2021-2025 jyldarǵa arnalǵan damý jospary
«Oblys ákiminiń orynbasary jáne Pavlodar qalasynyń ákimi retinde jospardy jasaýǵa qatystym. Jospar - qazir oblys ákimi retinde meniń basty qoldanatyn qujattyń biri. Onyń aıasynda 2023 jylǵa arnalǵan barlyq jospar tolyǵymen oryndaldy. Keıinge qaldyrylǵan bir ǵana jospar oblys ortalyǵyndaǵy Ertis ózeninen ótetin úlken kópir salý. Onyń sebebi jobalyq-smetalyq qujat pen memlekettik saraptamanyń keshigýi. Ol Kólik mınıstrliginiń jaýapkershiliginde, ol jerde jobalyq-smetalyq qujatqa kópir qurylysyna bólinetin qarajatty arzandatý boıynsha ózgerister engizildi. Birinshi joba boıynsha qymbatqa shyqty, ekinshiden konstrýktsııasyn ózgertý. Odan bólek, bıyl 30 feldsherlik-akýsherlik pýnkt salynady, onyń bári aýyldyq jerde turǵyzylady. Onyń ishinde 12 pýnkt bıyl, al qalǵan 18 pýnkt 2025 jyly salynady. Qarajat tolyqtaı Úkimettiń bıýdjetinen bólinedi, bul jumys meniń baqylaýymda», - deıdi ol.
«Ońtústikten soltústikke»: Pavlodarǵa jylyna 5 myńdaı turǵyn kóship keledi
«Kóshi-qonnyń birneshe sebebi bar. Eń aldymen biz shekarada ornalasqanbyz, kórshi memlekettegi iri qalada 10 mln halyq turady. Ultaralyq qarym-qatynas tyǵyz, óńirdegi halyqtyń 56,5% qazaq, qalǵan 43,5% ózge ult ókilderi, onyń ishinde 30% orys. Odan bólek, ishki kóshi-qon máselesi de bar. Biz ońtústikten kóshi-qon baǵdarlamasyn iske asyryp jatyrmyz, jyl saıyn biz jaqqa 3-5 myń adam (Túrkistan oblysy, Qyzylorda oblysy, Almaty oblysy) kóship keledi. Olardy aldymen turǵyn úımen sodan soń jumyspen qamtımyz, sebebi jaıdan-jaı eshkim kóship kelmeıdi», - dedi óńir basshysy.
Pavlodar ındýstrııalyq-óndiristik aımaq: memlekettiń 42% elektr energııasy, 60% kómiri óndiriledi
«Baıanaýylda 28 aýyl bolsa, búginde onyń 6-da ortalyqtandyrylǵan sý qubyry joq. Qurylys júrip jatyr, bıyl 4-in aıaqtaımyz, 2-i endigi jylǵa qalady. Men ózim Baıanaýyldyń týmasymyn (Máshhúr Júsip aýyly). Ol jerde sý qubyryn salý ońaı emes, sebebi jeri tasty. Qazir Toraıǵyrda sý qubyryn salý jumysy toqtatyldy, óıtkeni sýdyń asty tas, ony buzatyn tehnıkany qoldansaq, onda eski úılerge zaqym keledi. Endigi jyly Baıanaýyldyń eldi mekenderi aýyz sý jetkiziledi», - dep ýáde berdi ákim.
Ekibastuzdaǵy apat: turǵyndar bıyl qystan qalaı shyqty?
Aıta ketsek, 2022 jyly 27 qarashada Ekibastuz JEO-synda apat bolyp, qala turǵyndary jylýsyz qaldy. 28 qarasha kúni tańerteń qalada jergilikti aýqymdaǵy tótenshe jaǵdaı jarııalandy. Sol jyly jeltoqsanda Prezıdent Qasym-Jomart Toqaev Ekibastuzdaǵy jóndeý jumystarynyń barysy týraly Premer-Mınıstrdiń baıandamasyn tyńdady.
«2022 jyly bolǵan apatqa baılanysty Prezıdent birqatar tapsyrma bergen edi. Byltyr 9 tamyzda Memleket basshysy Ekibastuz qalasyna is-saparmen keldi. Qaladaǵy apatqa qatysty 4 baǵytta jumys júrgizdik, birinshi jylý ortalyǵyn jóndeý, ekinshi, jelilerdi jóndeý, úshinshi, turǵyn úılerdi jylytý maýsymyna daıyndaý jáne sońǵysy jylý júıesine tehnıkalyq aýdıt jasaý. Tórt baǵyt tolyqtaı oryndaldy, tek tehnıkalyq aýdıt bıyl aıaqtalady, óıtkenshi keshendi jumys. Bıyl qysta Ekibastuzda jylytý maýsymy turaqty ótti. Negizi Pavlodar, Ekibastuz, Aqsý qalasyndaǵy jylý jelileriniń 86-90% tozǵan. Prezıdent júktegen mindetke sáıkes 10 jylytý qazandyǵynyń 8-i kúrdeli jóndeýden ótti, qalǵany aǵymdyq jóndeldi. Odan basqa 70 shaqyrymǵa jýyq jeli jańartyldy. Ekibastuzda uzyndyǵy 6 shaqyrym jetinshi jylý magıstrıaly jáne 12 shaqyrymdyq magıstrıaldyq-tehnıkalyq sý qubyry qys boıy salyndy, bir apta shamasynda bitedi. Qurylys aıaqtaldy, endi qabyldap, iske asyrýǵa daıyndap jatyrmyz», - dedi ol.
Maıqaıyńdaǵy apat: Asaıyn Baıhanov qaıtys bolǵan jumysshylardyń otbasyna kóńil aıtyp, keshirim surady
Eske sala keteıik, bıyl 4 qańtarda Baıanaýyl aýdany Maıqaıyń kentindegi «Maıqaıyńaltyn» AQ aýmaǵynda apat boldy. Artynan qylmystyq is qozǵaldy, ol boıynsha joldyń opyrylyp qulaý sebepterin anyqtaý úshin elimizdiń túrli aımaqtarynan taý-ken-qurylys jumystary salasynyń mamandaryn tarta otyryp, birqatar saraptama taǵaıyndalǵan.
Іs Bas Prokýratýranyń baqylaýynda.
«Óndiris sektorynda 80 myńnan astam adam eńbek etip jatyr. Óndiris ornynda jaraqat alý, adam shyǵyn joq dep aıta almaımyz. Biraq ár oqıǵa jeke zerttelip, taldalyp tıisti sheshim qabyldandy. Bıyl 5 qańtarda túngi saǵat 01:20-da Maıqaıyńda apat boldy, oqıǵa ornyna bardym. Jaryq túsken soń apat ornynan 2 máıitti alyp shyqtyq, qalǵan adamdardy izdeý jumysy jalǵasty. Keıin izdestirýdi ýaqytsha toqtattyq, oǵan sebep biz ǵalymdardy tartyp zertteý jumystaryn júrgizip jatyrmyz. Mamandardyń kómegimen oıylǵan shuńqyrdyń qandaı qaýpi bar, onyń kólemi ulǵaıa ma, joq pa sony bilmekpiz. Shuńqyrdyń tereńdigi 60 metrden asady, oǵan túsken qutqarýshylardyń ómirine qaýip joǵary. Saraptamanyń nátıjesi mamyrdyń basynda daıyn bolady, sonyń nátıjesinde izdeý jumysyn jalǵastyrýǵa qatysty keńes, qorytyndy berýi kerek», - dep tolyqtyrdy A. Baıhanov.
Byltyr Pavlodar oblysyna 800 mlrd teńge ınvestıtsııa tartylǵan (85% jeke, 15% memlekettik), bıyl kórsetkishti 1 trln teńgege jetkizbek. Investıtsııanyń deni óndiriske, odan ári aýyl sharýashylyǵy, shaǵyn jáne orta bızneske quıylǵan.
«Ákim aldymen halyqqa jaqyn bolý kerek. Halyqtyń ómirimen ekran arqyly emes, óz aıaǵymen baryp tanysý qajet. Kez kelgen problema ýaqytyly sheshilýi tıis», - dep túıindedi Pavlodar oblysynyń ákimi.
