Pavlodarda Ertis ózenine batyp ketken er adam izdestirilip jatyr
PAVLODAR. KAZINFORM - Qaıǵyly oqıǵa Pavlodar aýdany Sychevka aýylynyń mańynda bolǵan. 1979 jylǵy er adam tyıym salynǵan, arnaıy jabdyqtalmaǵan jerde sýǵa túsken.
Súńgýirler Ertis ózeninde shomylyp júrip, sýǵa ketken er adamdy izdep jatyr.
Oblystyq tótenshe jaǵdaılar departamentiniń málimetinshe, qaıǵyly oqıǵa 15 tamyz kúni shomylýǵa tyıym salynǵan jáne arnaıy jabdyqtalmaǵan orynda bolǵan. Habarlama túsken boıda oqıǵa ornyna shuǵyl túrde qutqarýshylar toby jiberilgen.
Іzdeý-qutqarý sharalaryna tótenshe jaǵdaılar departamenti, jedel-qutqarý jasaǵy, polıtsııa departamenti men orman sharýashylyǵynyń kúshteri jumyldyryldy. Oblys ortalyǵynan oqıǵa ornyna eholotpen jáne motorly qaıyqpen jaraqtandyrylǵan 4 súńgýirden turatyn arnaıy top jetken.
- Іzdestirýdiń alǵashqy kúninde qutqarýshylar motorly qaıyqpen ózenniń qos jaǵalaýy boıynsha 11 shaqyrymǵa jýyq aýmaqty kózben sholyp shyqty. Sondaı-aq eholot qurylǵysynyń kómegimen Ertistiń 5 myń sharshy metrge jýyq túbi tekserilip, jaǵalaýdyń 5 shaqyrymy jaıaý barlandy. Súńgýirler toby ózen túbine 8 ret súńgip, izdeý júrgizdi, - dep habarlady departamentten.
Mamandar shomylýǵa tyıym salynǵan oryndarda sýǵa túsý adam ómirine óte qaýipti ekenin eskertedi.
Buǵan deıin Pavlodarda Sátbaev atyndaǵy kanalda er adam sýǵa batyp ketti.
