Pavlodarda Ertis ózenine 460 myńǵa jýyq sazan men tuqy shabaǵy jiberiledi
PAVLODAR. KAZINFORM — Pavlodar oblysynda kúzgi balyqtandyrý naýqany aıasynda Ertis ózenine 460 myńǵa jýyq sazan men tuqynyń bıylǵy shabaǵy jiberiledi. Balyqtandyrý jumystaryn 12 sharýashylyq júrgizedi, al shabaqtar elimizdiń ártúrli aımaqtarynan jetkiziledi.
Zaısan-Ertis basseındik balyq sharýashylyǵy ınspektsııasynyń málimetinshe, Ertis ózenin balyqtandyrý úshin qyrkúıek-qazan aılary eń qolaıly kezeń bolyp sanalady. Soǵan baılanysty jumystar kezeń-kezeńimen iske asyrylady.
- Búgingi tańda bir tabıǵat paıdalanýshy balyqtandyrý jumystaryn júrgizip úlgerdi. Sý aıdynyna tuqynyń 100 myń shabaǵy bosatyldy. Sonymen qatar memlekettik tapsyrys sheńberinde qosymsha sharalar uıymdastyrylady. Osy jyldyń qyrkúıek aıynyń sońynda Pavlodar oblysy shegindegi Q.Sátbaev atyndaǵy kanaldy balyqtandyrý josparlanǵan, — dedi Zaısan-Ertis basseındik balyq sharýashylyǵy ınspektsııasy basshysynyń orynbasary Jangeldi Qarabaev.
Q.Sátbaev atyndaǵy kanalǵa Jambyl oblysynan jetkiziletin 151 myńnan astam sazan men tuqy shabaǵy jiberilmek.
Mamandardyń aıtýynsha, bul sharalar — sý aıdyndaryndaǵy balyq qoryn saqtaý men qaıta qalpyna keltirýdiń tıimdi joly.
Buǵan deıin Ertis boıynda balyq ósirýdiń qıyndyǵy men artyqshylyǵy qandaı ekenin jazǵanbyz.
