Pavlodarda Ertis ózeninde qaıyq aýdarylyp, bir adam sýǵa ketti
PAVLODAR. KAZINFORM - Qutqarýshylardyń málimetinshe, qaıyqta 5 adam bolǵan. Olardyń tórteýi ózdiginen jaǵaǵa shyǵyp úlgergen, al bir adam sýda joǵalyp ketken.
Oblystyq tótenshe jaǵdaılar departamentiniń málimetinshe, qutqarýshylar Ertis ózeninde joǵalyp ketken er adamdy ekinshi kún qatarynan izdep jatyr. Іzdeý jumystaryna jedel-qutqarý jasaǵynyń 6 qutqarýshysy, 3 júzý quraly jáne 2 eholot jumyldyrylǵan.
Eki kún ishinde eholottyń kómegimen ózen túbiniń shamamen 35 shaqyrym aýmaǵy zertteldi. Sondaı-aq 11 ret súńgý jumystary júrgizilip, súńgýirler shamamen 5 myń sharshy metr aýmaqty teksergen.
- 112 pýltine habarlama 12 qyrkúıekte tústi. Janaýyl aýyly mańynda ishinde bes adam bolǵan alıýmınıı qaıyq aýdarylyp ketken. Tórt adam sýdan shyǵyp úlgerdi. 1983 jyly týǵan er adam sýǵa batyp ketken bolýy múmkin. Іzdeý jumystary jalǵasyp jatyr, – dep habarlady óńirlik tótenshe jaǵdaılar departamentinen.
Eske sala keteıik, Túrkistan oblysynda jyl basynan beri 29 bala sýǵa ketip, kóz jumdy.
