Pavlodarda Ertis ózeni ústinen salynyp jatqan jańa kópir bıyl ashylmaıdy
PAVLODAR. KAZINFORM — Ertis ózeni arqyly salynyp jatqan jańa avtokópirdiń aralyq qurylystaryn túıistirý jumystary 90 paıyzǵa aıaqtalǵan. Nysandy paıdalanýǵa berý merzimi 2027 jylǵa josparlanyp otyr.
Jańa avtokólik kópiriniń jalpy uzyndyǵy 678 metr. Onyń 616 metri qazirdiń ózinde daıyn bolyp qalǵan. Barlyq aralyq qurylysty qazan aıynyń ortasyna deıin túıistirý kózdelgen.
Odan soń kópirdi retteý, vantalyq júıeni tartý jáne bolat arqandaryn aldyn ala kerý jumystaryn isteý josparlanǵan. Asfalt tóseý jumystary kelesi jylǵa qaldyryldy.
Mamandardyń aıtýynsha, sýyq mezgilde asfalt tóseý sapasyna keri áser etýi múmkin.
— Shart boıynsha nysandy 2027 jyly tapsyrý josparlanǵan. Kólik qozǵalysyn shamamen 2027 jylǵy mamyr aıynda ashamyz, — deıdi «QazAvtoJol» UK» AQ Pavlodar oblystyq fılıalynyń dırektory Ermurat Nurhanov.
Jańa kópir ekstradozdy tehnologııamen salynyp jatyr. Onyń aralyǵynyń eni 32 metrge deıin jetedi. Jobaǵa shamamen 72 mlrd teńge ınvestıtsııa qarastyrylǵan.
Buǵan deıin Ertis ózeni arqyly salynyp jatqan jańa avtokópir jyl sońynda paıdalanýǵa berilýi múmkin ekenin jazǵanbyz.
Al eski kópir demalys ornyna aınalýy múmkin.
