Pavlodarda Ertis ózeni ústindegi eski kópir demalys ornyna aınalýy múmkin
PAVLODAR. KAZINFORM — Júrgizilip jatqan saraptamanyń qorytyndysy oń bolyp, jobany iske asyrý múmkindigi rastalǵan jaǵdaıda eski kópirdi beıimdeý jumystary júrgiziledi.
Pavlodar qalasynda Ertis ózeniniń ústinen salynyp jatqan jańa kópir bıyl jyl sońyna deıin ashylady dep kútilip otyr. Al turǵyzylǵany 64 jyl bolǵan eski kópirdi sol qalpynda saqtap, kópshilik serýendeıtin orynǵa aınaldyrý josparlanyp otyr.
— Qazirgi ýaqytta jańa kópirdi salýmen qatar, eski kópirdi saqtap qalý jáne ony qoǵamdyq keńistikke beıimdeý máselesi de qarastyrylýda. Osy maqsatta qoldanystaǵy qurylymnyń tehnıkalyq jaǵdaıy zerttelip jatyr. Zertteýdi 2026 jylǵy qyrkúıek aıynyń sońyna deıin aıaqtaý josparlanǵan, — dep habarlady oblys ákimdiginen.
Eger tehnıkalyq jaǵdaıy múmkindik berse, kópirdi qalalyq ortanyń bir bóligi retinde saqtap qalý múmkindigin qarastyrylady. Bul adamdardyń demalýyna arnalǵan, jaıaý júrginshiler aımaǵy, oryndyqtar jáne kógaldandyrý elementteri bar jaqsy orynǵa aınalýy múmkin. Mamandar bul nusqany jan-jaqty eseptep, onyń ekonomıkalyq tıimdiligin kópirdi buzý shyǵyndarymen salystyrýy qajet.
Eger saraptama ruqsat berse, eski kópirdi beıimdeý jumystary 2027 jyly júrgiziletin bolady.
Buǵan deıin Ertis arqyly ótetin jańa kópirdiń aralyqtaryn qyrkúıek aıynda túıistirý josparlanyp otyrǵanyn jazǵanbyz.
