Pavlodarda Ertis ózeni arqyly salynyp jatqan jańa avtokópir jyl sońynda paıdalanýǵa berilýi múmkin
PAVLODAR. KAZINFORM — Qurylysty salýshylar qazan aıynda kópirdiń tutas boıyndaǵy aralyq konstrýktsııalaryn aıaqtaýdy josparlap otyr. Bul kólikterdiń kópir ústimen júrýine múmkindik beredi.
QazAvtoJol kompanııasy óńirlik fılıalynyń basshysy Ermurat Nurhanovtyń dereginshe, jańa kópirdegi 691 metrlik aralyq qurylystyń 252 metri qazirdiń ózinde daıyn bolǵan.
— Eger kúzgi-qysqy kezeńde merdigerler aıyna shamamen kópirdiń 35-40 metr bóligin salyp kelse, kúnniń jylynýymen bul qarqyn arta túsetin bolady. Jalpy, jumys kestesinen qalý deregi joq. Jobaǵa 288 adam men 86 tehnıka jumyldyrylǵan. Kópir qurylysy bastalǵaly shamamen 30 myń tekshe metr beton jáne 8 myń tonna armatýra paıdalanyldy, — deıdi ol.
Jeti aıdan keıin merdigerler ózenniń eki jaǵalaýyn birtutas aralyq qurylyspen qosýdy kózdep otyr. Al jańa kópirdegi qozǵalysqa keletin bolsaq, ol bıylǵy jeltoqsan aıynda ashylýy múmkin. Abattandyrý jáne eski kópirdi buzý jumystary kelesi jylǵa qaldyrylady.
Atalǵan jańa kópir «Qyzylorda-Pavlodar-Ýspenka-RF shekarasy» avtojolynyń 1381 shaqyrymynda ornalasqan.
Eske sala keteıik, bıyl qysta Pavlodarda salynyp jatqan Ertis ózeni ústindegi kópir órtengen edi.
