Pavlodarda Ertis arqyly ótetin jańa kópirdiń aralyqtaryn qyrkúıek aıynda túıistirý josparlanyp otyr
PAVLODAR. KAZINFORM — Merdigerdiń málimetinshe, Ertis ózeni arqyly ótetin avtokólik kópiriniń qurylysy bekitilgen kesteden keshikpeı, qarqyndy júrip jatyr.
Qazirgi ýaqytta kópirdiń birneshe tiregine 276 metrlik aralyq qurylymdar ornatylǵanymen ázirshe ózara jalǵanbaǵan. Qurylysqa 288 adam men 88 arnaıy tehnıka jumyldyrylǵan.
— Qyrkúıek aıynda barlyq aralyq qurylymdy túıistirýdi josparlap otyrmyz, odan keıin bolat arqandardy tartý jumystary bastalady. Sondaı-aq, árbir aralyq qurylymda bıiktigi 20 metr bolatyn pılondar bar. Buǵan qosa, aspaly (vantty) júıe ornatylyp, eki jaǵynan 10 bolat arqannan tartylady, — deıdi «BI Group» kompanııasynyń jol ınfraqurylymy dıvızıonynyń tehnıkalyq dırektory Qanat Kósherbaev.
Barlyǵy oıdaǵydaı bolsa, qazan aıynda kópirde asfalt tóseý jáne abattandyrý jumystary bastalady. Atap aıtqanda, jaryq shamdary men qorshaýlar ornatylyp, jaıaý júrginshiler joly salynady.
Sonymen qatar, jańa kópirdi sándik jaryqpen bezendirý de josparda bar. Ol úshin Philips kompanııasyna arnaıy joba tapsyrylǵan. Joba aıasynda kópirdiń tómengi bóligine, aspaly arqandary men qorshaýlaryna dınamıkalyq jaryq júıesin ornatý qarastyrylǵan.
Eske sala keteıik, bıyl qysta Pavlodarda salynyp jatqan Ertis ózeni ústindegi kópir órtengen edi.
Sondaı-aq jańa avtokópir jyl sońynda paıdalanýǵa berilýi múmkin ekenin jazǵanbyz.
