Pavlodarda Ertis jaǵalaýy 1,1 shaqyrymǵa uzartylady
PAVLODAR. QazAqparat - Pavlodarda Ertis ózeniniń jaǵalaýy 1,1 shaqyrymǵa uzartylady. «QazTransOıl» AQ-nyń ákimshilik ǵımaratynyń tusynan bastap temirjol kópirine deıin júrgiziletin jumystarǵa 1 mlrd 300 mln teńge qarjy bólindi. Bul týraly «Pavlodar» korporatıvtik áleýmettik damý qorynyń dırektory Baqytrıza Dúısembaev málim etti, dep habarlaıdy QazAqparat pavlodarnews.kz saıtyna silteme jasap.
Jaǵalaýdy salýdaǵy negizgi maqsat - kóktemgi sý tasqyndarynan qorǵaý.
«Joba boıynsha konkýrs ótkizildi. «Alvıs» JShS utyp alyp, jeńimpaz atandy. Jumysty osy jyly sýyq túskenge deıin bitirý kerek. Aýa raıyna baılanysty bógetter bolsa, kelesi jyly da jalǵasýy múmkin. Bul jobaǵa 1 mıllıard 300 mıllıon teńge bólindi. Qarjy tolyqtaı demeýshilerdiń esebinen jumsalýda. Negizgi demeýshi - «KAZ Minerals Bozshakol» JShS», - dedi Baqytrıza Dúısembaev.
«Alvıs» JShS-niń ókili Saıat Baızaqovtyń aıtýynsha, jumystar jalpy uzyndyǵy 1100 metr aýmaqta atqarylady. Onyń ishinde «Qaz qonaq» paleontologııalyq eskertkishin 400 m aýmaqta aınalyp ótpek. Óıtkeni eskertkishti qozǵaýǵa tyıym salynǵan. Jaǵalaýdyń eni - 24 metr. Adamdar júretin trotýardyń eni 6 metr bolmaq.
Jobanyń avtory Ǵabıt Temirbaev jumystyń negizgi maqsaty jaǵalaýdy sý shaıyp ketýden saqtaý ekenin atap ótti.
«Bizdiń jobaǵa jaǵalaýdy bekitý jumystary ǵana kiredi. Jaǵalaýdy jyl saıyn sý shaıýda. Sondyqtan qorǵaný amaldaryn jasaımyz. Sondaı-aq jaýyn-shashynnyń sýy tómenge qaraı aǵyp ketýi úshin aryq qazylady. Ol aryqtyń boıynda birneshe bloktan turatyn tazartqysh, súzgi bolady. Ár blok lastaǵysh zattardan aryltady. Sońǵy blok ýltrakúlgin tazalaǵysh. Tazartqysh qurylǵy sekýndyna 120 lıtr sý ótkize alady. ıAǵnı, Ertiske taza sý quıylady. Jaǵalaýdyń aldyńǵy jasalǵan bóligindegi stıl saqtalady. Usaq tastar tógiledi. Usaq tastar tógý Eýropada kópten beri qoldanylyp kele jatqan ádis. Jumystyń qıyn jeri - jaǵalaýdyń óte eńis bolýy. Oǵan qosa, tehnıkamyz tym tómen túse almaıdy. Aýaraıy da bóget jasaýy múmkin. Nátıje bolý úshin jaǵalaý qurǵaq bolýy tıis», - dedi Ǵabıt Temirbaev.
Sonymen qatar, aldaǵy ýaqytta jaǵlaýdyń ústińgi bóliginde demalys saıabaǵy, oıyn-saýyqqa arnalǵan oryndar salý josparlanýda.
