Pavlodarda Ertis ózeninen tórt bala qutqaryldy
ASTANA. QazAqparat - Pavlodardaǵy Ertis ózenine sýǵa kete jazdaǵan tórt bala qutqaryldy, dep habarlaıdy «QazAqparat» HAA QR ІІM TJ komıtetiniń baspasóz qyzmetine silteme jasap.
«12 shilde kúni tústen keıin Pavlodar oblysy TJ departamentiniń jedel qutqarý otrıady kezekshi bóliminiń jedel áreketteriniń nátıjesinde tórt bala sýdan qutqaryldy. Kúndelikti kezekshiligine kirisken qutqarýshylar eń aldymen Ýsolka ózeniniń mańyn sholyp shyǵady. Bul joly da quramyna A.Noskov, A.Abdýlov jáne qoǵamdyq qutqarýshy D.Stashkov kiretin kezekshi top úlkenderdiń qaraýynsyz tórt balanyń ózenniń tyıym salynǵan jerine sýǵa túsip júrgenin baıqady. Sýǵa túsken balalar jaǵadan edáýir alystap ketken. Kásibı tájirıbeli qutqarýshylar mundaı batyldyq jaqsylyqqa ákelmeıtindigin eskertip, balalarǵa qaıyq jiberdi. Sóıtsek, balalar batyp bara jatqan bireýine qalǵandary kómek kórsetip, ózderi de ázer júzip keledi eken. Onyń ústine tórt qyzdyń 2005 jylǵy bireýi ǵana júzý biledi», - dedi TJ komıtetiniń baspasóz qyzmeti.
Batyp bara jatqan balalardyń boılaryn úreı bılegen, abyroı bolǵanda qutqarýshylar qaıyǵy der kezinde jetip úlgerip, balalar din aman qutqaryldy.
Komıtet qyzmetkerleriniń málimdeýinshe, qutqarýshylar tek profılaktıkalyq áńgimelesý júrgizýmen ǵana shektelip qalmaı, balalardy polıtsııa qyzmetkerlerine tapsyrǵan. Olar óz kezeginde olardyń ata-analaryn shaqyrtyp, túsindirý jumystaryn júrgizdi.
