Pavlodarda Ertis ózeni arqyly ótetin kópir salynady
PAVLODAR. QazAqparat - Qazirgi tańda Ertis ózeni arqyly ótetin kópir qurylysynyń jobalyq-smetalyq qujattamasy daıyndalýda, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde onlaın formatta ótken baspasóz máslıhatynda «QazAvtoJol «UK» AQ oblystyq fılıalynyń basshysy Aqylbek Qabyldın málim etti. - Eski kópir 1962 jyly salynǵan, - dep atap ótti Aqylbek Qabyldın. – Onyń qasynda jańa ekstradozdy kópirdiń qurylysy júrgiziledi. Jańa kópirdiń jobasy daıyndalýda. Jobany 2021 jyly aıaqtaý kózdelip otyr. Fılıal basshysynyń aıtýynsha, memlekettik saraptamanyń oń qorytyndysyn alǵannan keıin qurylysty bastaý josparlanǵan. Qurylys kezinde eski kópir jabylmaıdy, janynan jańa ekstradozdy jartylaı kerme kópir salynady. Qurylys úsh jylǵa sozylady. Jańa nysannyń qurylysy aıaqtalǵannan keıin ári qaraı eski kópirge bólshekteý júrgiziledi. Sonymen qatar, spıker Pavlodar qalasynyń shyǵysyn aınalyp, «Qazaqstan alıýmınııi» arqyly ótetin Kenjekól aýylyndaǵy bóligine qatysty kópirdiń jobasy ázirlenip jatqanyn atap ótti. - Bul kópir Pavlodar aýylymen qosady, - deıdi Aqylbek Qabyldın. – Bir joba saraptamadan shyqty. Ekinshi kezeńin maýsym aıynda saraptamaǵa tapsyryp, tamyz aıynda alý josparlanyp otyr.
Eske sala keteıik, Pavlodarǵa kireberis kópir 1962 jyly salynǵan. Sońǵy ret nysannyń kúrdeli jóndeýi 16 jyl buryn júrgizilgen.