Pavlodarda Ertis muzynan bes bala qutqaryldy
PAVLODAR. QazAqparat - Demalys kúnderi reıd júrgizgen qutqarýshylar kezekti ret 12-15 jas aralyǵyndaǵy balalardy Ertis muzynan alyp tústi, dep habarlaıdy «QazAqparat» HAA tilshisi.
Qysqy ýaqytta jaǵalaý men qalalyq jaǵajaı aýmaǵy Pavlodardaǵy eń qaýipti oryndardyń birine aınalady, sebebi Aqsý qalasyndaǵy «Eýrazııalyq energetıkalyq korporatsııasy» AQ-nan aqqan jyly sý muzdyń tolyq qatýyna múmkindik bermeıdi jáne kóktem kelgenshe muz erigen kúıi turady, dep habarlady Pavlodar oblysy TJ departamentiniń baspasóz qyzmeti.
Jedel-qutqarý jasaǵynyń qyzmetkerleri turaqty túrde reıdtik sharalar júrgizedi jáne eskertý belgilerin ornatady. Biraq, soǵan qaramastan balalar qaýipti muz ústimen júrýge qumar. Demalys kúnderi reıd júrgizgen qutqarýshylar kezekti ret 2002-2005 jyldary týǵan balalardy Ertis muzynan alyp tústi. Olarmen túsindirý jumystary júrgizildi.
Kóktemgi muz qashanda qaýipti, dedi TJD qyzmetkerleri. Syrt kózge muz qalyń bolyp kóringenmen, kún astynda jibip turǵan muzdyń quramynda sý kóp. Muz astyna qulap ketken adamnyń aman qalýy ekitalaı, sebebi muz basqan sý arqyly qutqarýshylardyń qozǵalysy qıyndaı túsedi. Sýdyń qatty aǵysymen muz astyna ketken adamdy qutqarý qıyn. Adamnyń ózin ózi qutqarýyna da esh múmkindik bolmaıdy, sebebi sý men muzdyń arasynda aýa bolmaıdy.
Pavlodar oblysy TJ departamentiniń jedel-qutqarý jasaǵy óńir turǵyndaryna muzǵa shyǵýdyń qaýipti ekenin eskertedi.
