Pavlodarda erteńnen bastap jol erejesin baqylaıtyn jańa beınekameralar iske qosylady
PAVLODAR. KAZINFORM – Oblys ortalyǵynda jol erejesin buzyp, kameranyń qyraǵy kózine túsip qalǵandarǵa aıyppuldar kele bastaýy múmkin. Shahar boıynsha erteńnen bastap 100 apparattyq-baǵdarlamalyq keshen iske kirisedi.
«Qaýipsiz qala» úsh jyldyq jobasy aıasynda Pavlodarda 14 qarashadan bastap kóshe qıylystarynda ornatylǵan apparattyq-baǵdarlamalyq keshender jumys isteı bastaıdy. Qala kóshelerinde alǵashqy 100 apparattyq-baǵdarlamalyq keshen (ABK) iske qosylady. Sondaı-aq shahar boıynsha qoǵamdyq tártipti baqylaıtyn 3 000 jalpy beınebaqylaý kamerasy birtindep júıege jalǵanyp jatyr.
– Oblys boıynsha jalpy sany 420 ABK ornatý kózdelgen bolatyn. Sonyń 240 danasy Pavlodarda ornatyldy. Erteńnen bastap sonyń 100-i iske kirisedi. Kólik júrgizýshileri jol erejesin buzbaı, abaılap júrgenderi abzal. Sebebi bul ABK-lardyń barlyǵy polıtsııanyń jedel basqarý ortalyǵyna jalǵanǵan. Ári QR Іshki ister mınıstrligine, prokýratýra organdaryna tikeleı kórsetilim júrgiziledi. Sondyqtan jol erejesin buzǵan kólik ıelerine polıtsııa organdary tarapynan aıyppuldar kele bastaýy múmkin, - dep habarlady óńirlik tsıfrlyq tehnologııalar basqarmasynyń basshysy Aǵybaı Ámirın.
Basqarma basshysynyń aıtýynsha, ár kóshe qıylysynda 5-ten 10-ǵa deıin álgindeı ABK-lar bar. Olardyń sany joldyń eki nemese odan da kóp jolaqty bolýyna baılanysty aldyn ala belgilenip ornatylǵan. Qazirgi ýaqytta elimizdiń avtojoldaryndaǵy avtomatty beınebaqylaý júıelerinde eń jıi tirkeletin zań buzýshylyq - júrgizýshiler tarapynan jyldamdyqty shamadan tys asyrý. ABK-lar áýelgi kezekte jyldamdyqty asyrǵandardy, baǵdarshamnyń qyzyl túsine ótkenderdi, tyıym salynǵan jol jolaǵyn basqandardy jáne basqa da zań buzýshylyqtardy tirkeıdi.
Buǵan deıin jaýapty basqarma barlyq kameralar bıylǵy 1 qarashada iske qosylýy múmkin ekenin aıtqan. Biraq júıelerdi merdiger kompanııa belgili sebepter boıynsha kesh ornatýǵa májbúr bolǵan.
– Beınebaqylaý júıesi boıynsha jobany utyp alǵan «Antarium Group» JShS-nan bólek, aldyndaǵy konkýrsqa taǵy 3 kompanııa qatysqan. Olar konkýrs nátıjelerimen kelispeı, bizdi sotqa berdi. Saldarynan sot isi biraz ýaqytqa ulasyp, Almaty soty jabdyqtardy ornatý jumystaryna tyıym salyp qoıdy. Tek osy jaqynda ǵana sottyń oń sheshimi shyǵarylyp, jumystar qaýyrt túrde qaıta jalǵasty. Merdigerdiń jobany kesh tapsyrýynyń óz sebebi bar. Biz kameralardy ornatqany úshin merdigerge aqsha tólemeımiz. Tek serıvıstik qyzmet kórsetkeni úshin, júıe tolyq iske qosylyp jumys isteı bastaǵanda ǵana tóleı bastaımyz. Jalpy «Antarium Group» JShS-men 3 jylǵa servıstik model boıynsha jalpy somasy 8,5 mlrd teńgege shart jasaldy, - dep qosty Aǵybaı Ámirın.
Barlyq beınekameralar óńirlik polıtsııa departamenti men tótenshe jaǵdaılar departamentiniń usynystary boıynsha belgili bir kóshe qıylystaryna, kóshe boılaryna ornatylǵan. Beınekameralardy qýat kózine qosý boıynsha da birqatar máseleler týyndaǵan. Jergilikti energııa taratýshy uıym tehnıkalyq sharttardy kezeń-kezeńimen berip, soǵan oraı búginde keıbir kóshe kameralary áli de qýat kózine jalǵanbaǵany anyqtaldy.
– Kameralar men ABK-lardy sertıfıkattaý isi áli de jalǵasyp jatyr.Árbir kamera sertıfıkattaýdan ótedi, tekseriledi. Jaýapty komıtetke barlyq kameralar jiberilgen, olardy qaraý biraz ýaqytty alady. Aı sońyna deıin barlyq beınekamaralar tıisti tekserýden ótkizilip, sertıfıkattar beriledi dep kútilip otyr, - deıdi basqarma basshysy.
Bılik ókilderi Pavlodar qalasyndaǵy barlyq 240 ABK men qoǵamdyq qaýipsizdikti baqylaýǵa arnalǵan 3000 beınebaqylaý kamerasy qarasha aıynyń sońynda tolyq iske qosylyp bolady ýáde etip otyr.
Buǵan deıin Pavlodar kóshelerinde bet-álpetti tanıtyn beınekameralar ornatylyp jatqany týraly habarlaǵanbyz.
Al tamyz aıynda Aqsý men Ekibastuz qalalarynda avtomattyq baqylaý júıeleri iske qosylǵan bolatyn.