Pavlodarda erkeligi úshin balalaryn uryp-soqqan ákege qatysty tergeý júrip jatyr
PAVLODAR. QazAqparat – Pavlodarda balalarynyń erkeligin kótere almaǵan áke olardy uryp-soqqan. Polıtsııa tergeýdi bastady, dep habarlaıdy QazAqparat.
Polıtsııaǵa Pavlodar qalasynyń 36 jastaǵy turǵyny júginip, 28 qazanda kúıeýi alty jasar uly men jeti jasar qyzyn urypty. Ulynyń eki tisin syndyrǵan eken.
«Qońyraýǵa kelgen polıtsııa qyzmetkerleri áıeldiń oqıǵa kezinde jumysta bolǵanyn anyqtady. Ákesimen qalǵan balalar erkelep, balkonǵa qaraı júgirip, ákesiniń sózin elemegen. Balalardy basý úshin er adam olarǵa qol kótergen», - dep habarlady Pavlodar oblystyq Polıtsııa departamentiniń baspasóz qyzmeti.
Balalardyń anasy úıge kelgeninde otaǵasy jumysqa ketip qalǵan eken. Áıel dereý medıtsınalyq kómekke júgingen.
Pavlolar turǵynyna qatysty atalǵan fakti boıynsha QR QK 140-babynyń 2-tarmaǵy negizinde sotqa deıingi tergeý qozǵaldy. Saraptama taǵaıyndaldy.
Tergeý kezinde ákesi otbasynan tys jerde.
Tártip saqshylary kóbinese zorlyq-zombylyq qurbandary kómek suramaıtynyn atap ótti. Zorlyq-zombylyq faktileriniń únsiz qalýynyń sebebi – quqyq buzýshyǵa qatysty zańdy bilmeý jáne aıaýshylyq.
«Qazirgi ýaqytta Pavlodar oblysynda turmys salasyndaǵy quqyq buzýshylyqtar úshin 3476 adam ákimshilik jaýapqa tartyldy, onyń ishinde: 2486-sy – otbasy-turmystyq qatynastar salasyndaǵy quqyqqa qaıshy áreketteri úshin, 754-i – qasaqana densaýlyqqa jeńil zııan keltirgeni úshin, 236-sy – uryp-soqqany úshin. Sondaı-aq, kámeletke tolmaǵan balany tárbıeleý boıynsha mindetterdi oryndamaǵany úshin eki fakt boıynsha sotqa deıingi tergeý júrgizilýde», - dep habarlady polıtsııadan.
Avtor: Anton Gagarın
