Pavlodarda erekshe qajettilikteri bar daýys berýshilerge jaǵdaı jasalyp jatyr

PAVLODAR. KAZINFORM — Oblys boıynsha 26 myńǵa jýyq múmkindigi shekteýli jan daýys berý quqyǵyna ıe. Olardyń ishinde 3200 adamǵa erekshe jaǵdaılar qajet.

Óńirlik jumyspen qamtýdy úılestirý jáne áleýmettik baǵdarlamalar departamenti basshysynyń orynbasary Álııa Rahymovanyń aıtýynsha, Pavlodar oblysy múgedektigi bar azamattardyń qajettilikterin eskere otyryp, referendýmǵa júıeli túrde daıyndalyp jatyr. Referendým ýchaskeleriniń qoljetimdiligine jáne basqa azamattarmen teń dárejede daýys berý múmkindigine erekshe nazar aýdarylǵan.

— Qazirgi ýaqytta aımaqta shamamen 30 myń múgedek adam tursa, olardyń 26 myńdaıy daýys berý quqyǵyna ıe. Sonyń ishinde 3200 adamnyń suranysyna saı erekshe jaǵdaılar jasalyp jatyr. Máselen, 1081 jan múgedekter arbasyn paıdalansa, 1513 adamnyń kórý qabileti nashar. Onyń ishinde 46-sy Braıl álipbıin túsinedi, al 639 adamnyń estý qabileti nashar, — deıdi basqarma ókili.

Arbaǵa tańylǵandar 305 referendým ýchaskesinde, kórý qabileti nashar daýys berýshiler 365 ýchaskede, al estý qabileti nashar daýys berýshiler 293 ýchaskede daýys bere alady.
Mundaı daýys berýshilerdiń eń kóbi Pavlodar qalasynda turyp jatyr — 1447 adam.

Eske sala keteıik, Referendým kúni Pavlodarda 1,5 myńnan astam táýelsiz baqylaýshy qyzmet etedi.