Pavlodarda erekshe balany urǵan tárbıeshi 40 táýlikke qamalýy múmkin

PAVLODAR. KAZINFORM — Bala korrektsııalyq ortalyqta tárbıelenip kelgen. Qol kótergen tárbıeshi 590 myń teńge kóleminde aıyppul tóleýi nemese 40 táýlikke qamalýy múmkin.

Tárbıeshiniń balaǵa qol jumsaǵan sáti túsirilgen beınejazba áleýmettik jelini kezip ketti.

Oqıǵa Pavlodar qalasyndaǵy balalardyń korrektsııa ortalyǵynda bolǵan. 

Bala aqyly ortalyqta tárıbelengen.

Jetkinshektiń denesinde kógergen daqtardy baıqaǵan anasy dabyl qaǵyp, mekeme dırektorymen birge kameralardy teksergen.

Nátıjesinde tárbıeshiniń balany urǵany dáleldenip otyr.

Korrektsııalyq ortalyqtaǵylar pedagogtyń ertesinde-aq jumystan qýylǵanyn málimdedi. Mekeme jeke menshik nysanynda bolǵan.

Pavlodar oblysynyń bala quqyqtary jónindegi ýákili Natalıa Pokıdova keleńsiz jaıtty óz baqylaýyna alǵanyn habarlady.

«Mekemeniń tárbıeshisine qatysty QR Qylmystyq kodeksiniń 140-baby (Kámeletke tolmaǵan adamdy tárbıeleý jónindegi mindetterdi oryndamaý) boıynsha is qozǵaldy. Qorytyndysy boıynsha tıisti sharalar qabyldanady. Quqyq qorǵaý organdary qazir sotqa deıingi tergeý jáne sot-medıtsınalyq saraptama júrgizip jatyr» dep habarlady maman.

Kúdiktiniń kinási tolyq dáleldense, ol 160 aılyq eseptik kórsetkish kóleminde aıyppul tóleıdi, ne sol mólsherde túzeý jumystaryna, bolmaǵan jaǵdaıda 160 saǵatqa qoǵamdyq jumysqa tartylady.

Sondaı-aq 140-bapta 40 táýlikke qamaqqa alý jazasy da qarastyrylǵan.