Pavlodarda ishimdik ishken ákesi úsh jasar qyzyn óltirip qoıǵan

PAVLODAR. KAZINFORM — Kúdikti ýaqytsha qamaý ortalyǵyna qamaldy. Oǵan qatysty QR Qylmystyq kodeksiniń 99-baby boıynsha qylmystyq is qozǵaldy. 

Áleýmettik jelide mas kúıde bolǵan er adamnyń balasyn jerge soǵyp óltirip alǵany týraly aqparat tarady. Qaıǵyly oqıǵa 20 qyrkúıek kúni Tereńkól aýdany Osmeryjsk aýylynda bolǵan.

— 2025 jylǵy 20 qyrkúıek kúni túnde Tereńkól aýdandyq aýrýhanasynyń qabyldaý bólimine 3 jasar bala jetkizildi. Túsken kezdegi jaǵdaıy asa aýyr, bala esinen tanǵan, eshqandaı reaktsııa bermedi. Hırýrg dárigerler balany qarap, jabyq shúıde súıeginiń synýy dıagnozyn qoıǵan. Buǵan qosa sol jaq qasústi aımaǵynda jyrtylǵan jara, deneniń jumsaq tinderinde kóptegen soǵylǵan jaraqat pen kógerýler bolǵan. Reanımatsııalyq sharalar nátıjesiz boldy. Balanyń múrdesi sot-medıtsınalyq saraptamaǵa jiberilgen. Tergeý amaldary júrgizilip jatyr, — dep habarlady óńirlik densaýlyq saqtaý basqarmasynan.

Atalǵan derek boıynsha polıtsııa qylmystyq is qozǵady.

— Aldyn ala málimetterge sáıkes, Tereńkól aýylyndaǵy úıden dene jaraqattaryn alǵan jábirlenýshi aýrýhanaǵa jetkizilgen. Alaıda ol esin jımastan kóz jumdy. Atalǵan qylmysty jasady degen kúdikpen jábirlenýshiniń ákesi anyqtalyp, ustaldy jáne sot sanktsııasymen qamaýǵa alyndy, — dep málimdedi óńirlik polıtsııa departamentinen.

Oqıǵanyń mán-jaıy men sebepteri tergeý barysynda anyqtalatyn bolady.

Eske sala keteıik, Oralda denesiniń kóp bóligin kúıik shalǵan 8 jasar bala kóz jumdy.