Pavlodarda er adam densaýlyǵyna baılanysty júrgizýshi kýáliginen aırylyp qalǵanyn bilmegen
PAVLODAR. KAZINFORM - 51 jastaǵy Sergeı Dýkachev sot sheshim shyǵarǵannan keıin bir aıdan astam ýaqyt ótkende ǵana júrgizýshi quqyǵynan aıyrylǵanyn bilgen.
Sergeı Dýkachev júrgizýshi kýáligin osydan 15 jyl buryn alǵan. Atalǵan qujatty sońǵy ret 2020 jyly jańartqan ári osy ýaqytqa deıin eshbir másele týyndamaǵan. Alaıda naýryz aıynyń ortasynda oılamaǵan jerden sot oryndaýshysynan hat keledi. Onda er adam memlekettik baj salyǵy úshin shamamen 2700 teńge qaryz ekeni kórsetilgen.
— Sot 23 qańtarda ótipti. Biraq maǵan ol týraly eshqandaı habarlama kelgen joq. Basynda muny bireýlerdiń ázili nemese alaıaqtardyń isi bolar dep oıladym. Qazir eshkimge senýge bolmaıtyn zaman ǵoı. Sodan soń jan-jaqty teksere bastadym. Resmı saıtqa silteme arqyly emes, ınternetten izdep kirdim, — deıdi Sergeı Dýkachev.
Pavlodarlyq turǵyn azamattyq ister jónindegi aýdanaralyq sottyń sheshimin taýyp alady. Іs qysqartylǵan tártippen qaralyp, onda Sergeıdiń júrgizýshi kýáliginen aırylǵany kórsetilgen.
Bul jańalyq er adamdy eseńgiretip tastaıdy. Sebebi ol osy ýaqytqa deıin jol erejesin buzbaǵan. Menshiginde 4 avtokóligi bolsa da, qys mezgilinde múlde kólik aıdamaıdy eken. Qansha suraý salsa da, birde-bir mekemeden mardymdy jaýap ala almaıdy.
Jaǵdaıdy polıtsııa ókilderi túsindirip berdi. Aıtýlarynsha Pavlodar oblysynda Sergeı Dýkachevtiń kebin kıgen 450-den astam adam bar bolyp shyqty.
— Bizge Pavlodar oblysy prokýratýrasynan medıtsınalyq qarsy kórsetilimderi bolýyna baılanysty kólik quralyn basqarýǵa quqyǵy joq tulǵalar boıynsha usynystar tústi. Óz kezegimizde talap qoıý isterin qozǵap, sot organdaryna joldadyq. Qazirgi tańda óńirimiz boıynsha 450 talap qoıý isi qozǵaldy, — deıdi oblystyq polıtsııa departamenti ákimshilik polıtsııa basqarmasy protsessıng ortalyǵynyń aǵa memlekettik avtoınspektory Záýresh Altybasarova.
Tártip saqshylary prokýratýranyń pármenimen qozǵalǵan joǵarydaǵy ister Sergeıge tikeleı qatysty ekenin aıtady. Biraq azamat sot tyńdaýyna shaqyrylýy tıis edi. Qazirdiń ózinde aımaqta 50-ge jýyq júrgizýshi dárigerlerden kólik basqarýǵa bolatyny týraly anyqtama alyp, óz quqyqtaryn qalpyna keltirgen.
Al Sergeıdiń densaýlyǵy kináratsyz emes, «Behterev aýrýy» dıagnozy qoıylǵan. Bul dertpen kópten beri aýyrsa da, múgedektikti osydan birneshe jyl buryn ǵana alǵan.
— Men munyń barlyǵyn ózim boljap, ózim túsinýim kerek pe? Eger bul jaǵdaı medıtsınalyq kórsetkishter boıynsha, ıaǵnı meniń ekinshi toptaǵy múgedek ekendigime baılanysty bolsa, onda sol komıssııadan anyqtama nemese bir qujat berilýi kerek emes pe? Biraq men eshbir aqparat ala almaı otyrmyn, — dep qynjylady Sergeı Dýkachev.
Polıtseıler júrgizýshi kýáligin qaıtarýǵa múmkindik bar ekenin atap ótti. Ol úshin dárigerlerden anyqtama alyp, sotqa talap aryz berý qajet. Eger sot azamatty qoldasa, sol sheshimmen qujattardy qalpyna keltirý úshin polıtsııaǵa júginýge bolady.
Eske sala keteıik, UQK úsh óńirde júrgizýshi kýáligin rásimdeýdegi jemqorlyq shemasyn áshkereledi.
