Pavlodarda er adam muz astyna túsip ketken
ASTANA. QazAqparat - Pavlodarda Ýsolka ózeninde serýendep júrgen 1990 jylǵy er adam ajal aýzynan aman qaldy.
Bul týraly oblystyq TJD-niń memlekettik til jáne aqparat toby, málim etti, dep habarlaıdy pavlodarnews.kz .
«Ol keshe, 3 jeltoqsan kúni keshki saǵat 17:00 kezinde konkımen juqa muzdyń ústinde syrǵanap júrgen. Kenetten muz oıylyp, er adam astyna túsip ketken. Abyroı bolǵanda, oqıǵa ornynda bolǵan kutqarýshylar turǵyndy jaǵaǵa alyp shyqty», - dedi departamentte.
Mamandardyń aıtýynsha, jergilikti telearnalarda juqa muzdyń ústimen júrý adam ómirine qaýipti ekendigi týraly rolıkter kórsetilip, turǵyndar arasynda aldyn alý sharalary júrgizilýde. Dese de, sońǵy kezderi óz ómirin qaýip-qaterge tigip, osyndaı qadamǵa baratyn jaǵdaılar jıilep otyr.
