Pavlodarda er adam ıis tıip qaıtys boldy

PAVLODAR. KAZINFORM - Taǵy eki adam aýyr halde aýrýhanaǵa jetkizilgen. Oqıǵa Pavlodar qalasynyń mańyndaǵy aýyldardyń birinde bolǵan.

Bul týraly Pavlodar oblysynyń Tótenshe jaǵdaılar departamentiniń baspasóz qyzmetinen habarlandy.

«11 naýryz kúni saǵat 10.05-te polıtsııa qyzmetinen jer úıde 3 adamnyń es-tússiz jatqany týraly habar tústi. Jedel járdem brıgadasy er azamattyń qaıtys bolǵanyn anyqtady», - dep málimdedi baspasóz qyzmetinen.

Departament bastyǵy Jasulan Jumashev Óńirlik kommýnıkatsııalar qyzmetinde ótken brıfıngte atalǵan úsh adam bir otbasy músheleri ekenin, olarǵa úıdegi peshtiń jaryǵynan ıis tıgenin aıtty. Kóz jumǵan jigit 1996 jylǵy. Olardy eń áýeli jumystaǵy áriptesteri baıqaǵan. Otbasy músheleriniń bireýi memlekettik qyzmet salasynda jumys isteıdi.

Jer úılerdegi órtený oqıǵalarynyń jıilep ketýi tótenshe jaǵdaılar qyzmetiniń mamandaryn alańdatyp otyr. Jylý maýsymy bastalǵaly, ıaǵnı ótken jyldyń qazan aıynan beri oblysta osyndaı 66 oqıǵa tirkelip, saldarynan 5 adam tilsiz jaýdyń qurbany bolǵan. Taǵy 9 adam jaraqat alǵan. Al órtten kelgen jalpy materıaldyq shyǵyn – 11 mln teńge.