Pavlodarda er adam áıeli men úsh balasyn órtten qutqaryp, ózi qurban boldy

PAVLODAR. KAZINFORM – Er adam órtenip jatqan úıdiń terezesinen otbasy múshelerin túgel alyp shyqqan. Biraq kóp uzamaı ózi aýrýhanada kóz jumdy.

Pavlodar oblysy Tereńkól aýdany ortalyǵynda er adam erlikpen qaza tapty. Ol janyp jatqan úıden áıeli men úsh balasyn qutqara júrip, óz ómirin qıǵan.

– 9 qazan kúni Tereńkól aýylynda jer úıdiń otqa oranǵany týraly habarlama tústi. Órt sóndirý bólimsheleri jetken kezde ǵımarattaǵy aǵash shatyrdyń konstrýktsııalary janyp jatqan. Oqıǵa ornynda jedel járdem qyzmetkerlerine es-tússiz kúıdegi 1982 jyly týǵan er adam tapsyryldy. Ol órt sóndirý qyzmeti kelgenge deıin áıeli men úsh balasyn terezeden shyǵaryp alǵan. Otbasy músheleriniń barlyǵy jedel járdem qyzmetkerlerine tapsyryldy, - dep habarlady óńirlik tótenshe jaǵdaılar departamentinen. 

Ókinishke qaraı, er adam aýrýhanada kóz jumǵan. Departament mamandary órt 100 sharshy metr aýmaqty sharpyǵanyn aıtady. Qaıǵyly oqıǵanyń sebebi anyqtalyp jatyr.

Eske sala keteıik, Ekibastuzda jer úı órtenip, 6 adam mert boldy.