Pavlodarda engizilip jatqan tsıfrlyq syńar jylý júıesin naqty ýaqyt rejıminde baqylaýǵa múmkindik beredi
PAVLODAR. KAZINFORM — Pavlodarda jylý júıesiniń jumysyn naqty ýaqyt rejıminde baqylaýǵa múmkindik beretin tsıfrlyq syńar jobasy júzege asyrylyp jatyr. Joba aıasynda jylý jabdyqtaryna datchıkter ornatylyp, telemetrııa júıesi qosylady.
«Pavlodar jylý jelileri» JShS-nyń dırektory Anatolıı Moıseıdiń aıtýynsha, bul jylý stansalaryndaǵy dıspetcherlerge jylý pýnktteriniń jumysyn qashyqtan baqylap, jabdyq parametrlerindegi aýytqýlardy der kezinde anyqtaýǵa múmkindik beredi.
— Tsıfrlyq syńardy tolyq engizý jumystary áli jalǵasyp jatyr. Joba jyl basynan ınvestıtsııalyq baǵdarlama aıasynda júzege asyrylýda. Qazir belgili bir datchıkterdi qosý, telemetrııany engizý jáne barlyq derekterdi bir júıege biriktirý jumystary júrgizilip jatyr. Ázirshe tsıfrlyq syńar jylý júıesiniń jumysy týraly aldyn ala ǵana málimetter bere alady. Júıe tolyq iske qosylǵannan keıin dıspetcherler ortalyq jylý pýnktterindegi jabdyqtardyń parametrlerin naqty ýaqyt rejıminde kóre alady. Bul jylýmen jabdyqtaý sapasyn jaqsartý úshin qajetti sharalardy jedel qabyldaýǵa múmkindik beredi, — deıdi Anatolıı Moseı.
Onyń sózinshe, tsıfrlyq syńar jylý jelileriniń sońǵy núktelerindegi kórsetkishterdi qashyqtan baqylaýǵa da jaǵdaı jasaıdy. Qazir mundaı málimetterdi alý úshin dıspetcherlik qyzmet mamandary keıbir núktelerge baryp, parametrlerdi qolmen ólsheıdi. Jańa júıe tolyq iske qosylǵan soń bul jumystyń bir bóligin qashyqtan oryndaýǵa bolady.
Maman Ekibastuz qalasyndaǵy tájirıbeni de atap ótti. Onda tsıfrlyq syńar Pavlodarǵa qaraǵanda erterek engizilgen. Sonyń arqasynda mamandar jylý júıesiniń shetki núktelerindegi kórsetkishterdi naqty ýaqyt rejıminde baqylap otyr.
Uıym málimetinshe, Pavlodarda jylytý maýsymy shtattyq rejımde ótip jatyr. Bıyl jeke turǵyn úı sektoryn áleýmettik nysandarmen qatar erterek qosý sheshimi qabyldanǵan. Bul kún sýytqanǵa deıin jylý júıesin rettep, qajetti parametrlerdi qalypqa keltirýge múmkindik bergen.
Sonymen qatar jylý júıesiniń sapasyn jaqsartý maqsatynda jıilik túrlendirgishterdi ornatý josparlanyp otyr.
Eske sala keteıik, Memleket basshysy Qasym-Jomart Toqaev «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda Úkimet qala ınfraqurylymynyń tsıfrlyq syńaryn ázirleýge tıis dep tapsyrma berdi.
