Pavlodarda kommýnaldyq qyzmetti jańǵyrtýǵa 13,6 mlrd teńge jumsalady
PAVLODAR. KAZINFORM – 2026–2027 jyldary óńirdiń úsh qalasynda onnan astam jobany júzege asyrý kózdelip otyr. Olardyń qatarynda «Teploservıs-Aqsý» men «Ekibastuz jylý jelileri» jelilerin, sondaı-aq aýyzsý sorǵy stansalaryn jańartý bar.
Energetıkalyq jáne kommýnaldyq sektorlardy jańǵyrtý ulttyq jobasy aıasynda Pavlodar oblysynda jóndeý jumystary bastaldy. Qazirgi ýaqytta Pavlodar, Ekibastuz, Aqsý qalalarynda 10-nan astam joba kózdelip otyr.
– Úsh qalada jalpy somasy 13,6 mlrd teńgege jańǵyrtý jobalary josparlanyp otyr. Atap aıtqanda, Pavlodarda – 5,8 mlrd, Ekibastuzda – 5,2 mlrd, al Aqsýǵa 2,6 mlrd teńge qajet bolady. «Teploservıs-Aqsý» MKK qalanyń magıstraldik jáne bólinis jelilerin kezeń-kezeńimen jańartsa, «Ekibastuz jylý jelileri» JShS jelilik ınfraqurylymdy rekonstrýktsııalaýmen aınalysady. Al Ekibastuzdaǵy «Gorvodokanal» MKK sorǵy stansasyn jóndeıdi, – dep habarlady Pavlodar oblysy energetıka jáne turǵyn úı-kommýnaldyq sharýashylyq basqarmasynan.
Jalpy, oblys ortalyǵynda jeti birdeı jobany iske asyrý kózdelgen.
Eske sala keteıik, BQO-da ulttyq joba aıasynda energetıkalyq nysandar jańǵyrtylyp jatyr.
