Pavlodarda eńbek basqarmasynyń basshysy paramen ustaldy
ASTANA. QazAqparat - Sybaılas jemqorlyqqa qarsy is-qımyl ulttyq bıýrosynyń Pavlodar oblysy boıynsha departamenti oblystyq eńbek basqarmasynyń basshysy E.Asqarovty paramen ustady.
E.Asqarovtyń qol astyndaǵy qyzmetkeriniń deldaldyǵymen «Pavlodar jeńil konstrýktsııalar zaýyty» JShS ókilinen kásiporyn jumysshysymen bolǵan baqytsyz oqıǵaǵa baılanysty oń tujyrymdama berý úshin 1 mıllıon teńge kóleminde zańsyz syıaqy alǵany anyqtaldy.
Ulttyq bıýronyń baspasóz qyzmetiniń habarlaýynsha, qazirgi ýaqytta E.Asqarov ustaldy jáne Pavlodar q. ýaqytsha ustaý oqshaýlaǵyshyna qamaldy. Sotqa deıingi tergeý amaldary júrýde.
