Pavlodarda «Eńbek» baǵdarlamasy boıynsha 549,8 mln teńge bólindi
PAVLODAR. QazAqparat -1 qyrkúıekten bastap bir myńnan astam pavlodarlyq «Eńbek» baǵdarlamasy boıynsha kolledjderde oqı bastaıdy. Sonymen qatar, Pavlodar oblysynda osy baǵdarlama boıynsha qysqa merzimdi kýrstarda oqýǵa 549,8 mln teńge, stıpendııaǵa taǵy 150,3 mln teńge bólindi, dep habarlaıdy pavlodarnews.kz.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń bastyǵy Qaırat Nurmaǵambetovtyń aıtýynsha, «Eńbek» baǵdarlamasynyń birinshi baǵyty aıasynda 1 qyrkúıekten bastap tehnıkalyq jáne kásiptik bilimi bar 1035 qyzmetkerdi oqytý josparlanǵan. - Búgingi tańda tehnıkalyq jáne kásiptik bilimge oqytýdy 2017 jyly qabyldanǵan 191 adam aıaqtady. Olardyń 131-i nemese 68,6 paıyzy jumysqa ornalastyryldy, - dedi Qaırat Nurmaǵambetov.
Oblys ákimi Bolat Baqaýov óz qaramaǵyndaǵylarǵa osy adamdardyń jumyspen qamtylý paıyzyn baqylaýdy tapsyrdy. - Bizge qansha adamdy turaqty jumyspen qamtı alǵanymyz, olardyń qanshasy zeınetaqy qoryna jarna aýdaratyny jáne qansha adam ýaqytsha jumys oryndarynda otyrǵandyǵy, qansha adam qujatsyz bes myń teńgege jumys isteıtini týraly naqty saraptama qajet. Biz jumystyń sapasyn baqylaýymyz jáne kóleńkeli ekonomıkaǵa qarsy turýymyz kerek, - dedi Bolat Baqaýov.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy eńbek naryǵynda suranysqa ıe mamandyqtar boıynsha kásiptik bilimge 1349 adamdy qysqa merzimde oqytý josparlanyp, nátıjesinde 1361 adam baǵyttalǵanyn da atap ótti ol.
Aıta keteıik, bul statıstıka boıynsha jaqsy kórsetkish oblys qalalaryna tıesili. Alaıda, biz qalaǵandaı jetkilikti adam oqymaıtyn nemese kýrstan keıin aýyl turǵyndary jumys taba almaıtyn aýdandar bar. Spıkerdiń aıtýynsha, qysqa merzimdi kásiptik oqýdy uıymdastyrý jospary Aqýly aýdany men Maı aýdany tarapynan oryndalǵan joq. Sonymen qatar, basqarma basshysy qysqa merzimdi kýrstardan ótken adamdardyń jumyspen qamtylý paıyzy boıynsha ázirge maqtana almady. - Bıyl 680 adam oqýyn aıaqtady. Onyń 122-si jumysqa ornalastyryldy. Búginde jumyspen qamtylý 17,9 paıyzdy quraıdy. Bul oqý aıaqtalýynan 10 kún ótpegenine baılanysty. Al jumysqa ornalasý úshin medıtsınalyq tekserýden ótýge baılanysty belgili bir protsedýra qajet. Ol 10 kúnge deıin sozylady. Jumys berýshiler de berilgen ótinishti bir kúnde qaramaıdy, - dep túsindirdi Qaırat Nurmaǵambetov.
Qaırat Nurmaǵambetovtyń aıtýynsha, aǵymdaǵy jyldyń shildesinde respýblıkalyq bıýdjettik komıssııa 54 myń qazaqstandyqtyń qysqa merzimdi oqýyna 7,9 mlrd teńge jáne stıpendııa úshin 5,7 mlrd teńge kóleminde qosymsha shyǵyndarǵa qarjy bólgen. Onyń ishinde Pavlodar oblysyna oqytýǵa 549,8 mıllıon teńge jáne stıpendııaǵa 150,3 mıllıon teńge bólindi. Bul somaǵa jyl sońyna deıin 2300 adam oqytylýy qajet. - Biz olardyń oqyp jatqanyn jáne mamandyqtaryn bilemiz, - dedi Bolat Baqaýov. – Sondyqtan nátıjeni 10 kún kútpeý úshin biz olardy jumysqa ornalastyrýdy josparlaı alamyz. Halyqty jumyspen qamtý birinshi kezektegi mindet. Bul adamdardyń taǵdyry. Sondyqtan eshqandaı qaýip bolmaýy kerek.
