Pavlodarda elikterdi zańsyz atqan aýyl turǵyny ustaldy
PAVLODAR. KAZINFORM — Zańsyz ańshylyqpen aınalysqan brakonerden myltyqtar tárkilengen. Sondaı-aq avtokólik salonynan tabylǵan eki eliktiń óleksesine sot-bıologııalyq saraptama taǵaıyndaldy.
«Brakoner» jedel-profılaktıkalyq is-sharasy aıasynda polıtsııa qyzmetkerleri Jelezın aýdanynyń Razdelnoe aýyly mańynda VAZ-21060 markaly avtomashınasyn toqtatyp, salonnan eki eliktiń óleksesin tapty.
— Kólik rólinde aýyl turǵyny bolǵan. Avtokóliktiń salonyn tekserý kezinde ańshylyq myltyqtar, jabaıy janýarlardyń eki óleksesi — elikter tabyldy. Zańsyz ań aýlaý deregi boıynsha sotqa deıingi tergeý júrgizilip jatyr. Elikterdiń tárkilengen ushalaryna sot-bıologııalyq saraptama taǵaıyndaldy. Avtokólik aıyppul turaǵyna qoıyldy, — dep habarlady Pavlodar oblysy polıtsııa departamenti jergilikti polıtsııa qyzmetiniń bastyǵy Qýanysh Mustafınov.
«Brakoner» is-sharasy bastalǵaly beri polıtseıler tabıǵatty qorǵaý zańnamasynyń 95 buzýshylyǵyn, onyń ishinde ańshylyq jáne balyq aýlaý erejelerin buzýdy toqtatty. 900 kılogramnan astam zańsyz aýlanǵan balyq resýrstary tárkilendi.
Eske sala keteıik, Ekibastuzda kásipkerlerden zańsyz salyq alynǵan.
