Pavlodarda elektr tarıfiniń ósýine ne áser etti

PAVLODAR. KAZINFORM — Oblys ortalyǵynyń turǵyndary tamyz aıynan bastap elektr jaryǵy úshin 10%-ǵa kóp tóleıtin bolady. Al bıýdjettik mekemeler úshin tarıf 19%-ǵa deıin ósip otyr.

Pavlodar qalasynda elektr qýatynyń tarıfi qymbattady. Jeke tutynýshylar endi ár kılovatt/saǵat úshin 21,63 teńge tóleıtin bolady. Buǵan deıingi tarıf — 19,66 teńge edi. Tarıftiń ósýi — shamamen 10%. Baǵanyń ózgerýi eń kóbi bıýdjettik mekemelerge qatysty bolyp otyr — 1 kılovatt/saǵat úshin burynǵy 67,53 teńgeniń ornyna budan bylaı 80,45 teńge tóleıtin bolady (19,1% ósti).

— Elektr qýatyn bosatý tarıfi burynǵy 29,04 teńgeden 32,58 teńgege ósti. ıAǵnı, ósim 12,2%-dy qurap otyr. Áý basta monopolıst kompanııa bul baǵany birden 40%-ǵa ósirý týraly usynyspen shyqqan. Biraq biz barlyǵyn qaıta eseptep, faktorlardy eskere otyryp dáleldi túrde 12,2%-ǵa túsirdik. Tarıftiń ózgerýine kompanııanyń ózindik shyǵyndarynyń 29%-ǵa artyp ketýi sebep bolyp otyr. Atap aıtqanda, biryńǵaı satyp alýshy men satýshy baǵany 24 teńgeden 32 teńgege deıin kótergen. Ekinshiden, kásiporynda bıyl ortasha eńbekaqy mólsheri 360 myń teńgeden 496 myń teńgege deıin joǵarylady. Ol da tarıftiń ózgerýine sebep boldy. Buǵan qosa Pavlodar elektr taratý toraptarynyń shyǵyny 30%-ǵa artqan. Sondaı-aq monopolıst elektr qýatyn tasymaldaý kezinde kóptegen jeke kompanııanyń jelilerin paıdalanatynyn eskerý kerek. Máselen bıyl «Qazaqstan temir joly» AQ-nyń jeli paıdalaný tarıfteri 48%-ǵa, «QazSýShar» RMK-da ol 112%-ǵa kóterilgen. Saldarynan álgi kompanııalardyń jelileri arqyly ótip, tutynýshylarǵa jetetin elektr energııasynyń ózindik quny qymbattaǵan, — dep túsindirdi tarıftiń ózgerýine áser etken faktorlardy Pavlodar oblysy tabıǵı monopolııalardy retteý departamentiniń basshysy Nurlan Nurmuratov.

Anyqtap bilgenimizdeı, tarıfke qýat naryǵyndaǵy baǵalardyń ózgerýi de yqpal etken. 1 megavatt buryn 1 mln 196 myń teńge tursa, qazir ol 1 mln 400 myń teńge bolyp bekitilgen.

— «Pavlodarenergo» tarıftik usynystarynda qosymsha paıda bolǵan shyǵyndar 12 mlrd teńge dep kórsetip, ortasha tarıfti 37 teńge deıin kóterýge árekettengen. Biraq biz óz tarapymyzdan taldaýlar júrgize kelip, qosymsha shyǵyndardy 5 mln teńge deıin tómendettik, negizsiz shyǵyndardy alyp tastadyq. Nátıjesinde tarıf tutynýshylarǵa asa aýyrlyq túsirmeıtin deńgeıde bekitildi. Munyń barlyǵy elimizdiń Tabıǵı monopolııalar týraly zańnamasy aıasynda júzege asty, — dep qosty Nurlan Nurmuratov.

Sońǵy ret oblys ortalyǵynda elektr qýatynyń tarıfi 2024 jyldyń tamyz aıynda kóterilgen.

Buǵan deıin Pavlodarda aýyl turǵyndary úshin aýyzsý tarıfi 30%-ǵa arzandaǵany týraly jazǵanbyz.