Pavlodarda elektr kerneýine túsken dala qusy órttiń týyndaýyna sebepker boldy
PAVLODAR. KAZINFORM - Pavlodarda dala qusy qyrdaǵy shóptiń janýyna sebepker boldy. Tótennen týyndaǵan tilsiz jaý 60 sharshy metr jerdi jaıpap ótken.
Pavlodarda Aqqýly men Besqaraǵaı aýyldarynyń aralyǵyndaǵy jol boıy órtendi. Anyqtalǵandaı, órtke dala qusy sebepker bolǵan.
«101 pýltine № 18 órt sóndirý beketi boıynsha Aqqýly men Besqaraǵaı aýyldarynyń arasyndaǵy aýdandyq jol jıeginde qurǵaq shóptiń janýy týraly habarlama kelip tústi. Oqıǵa ornyna órt sóndirýshiler, erikti órt sóndirý bólimderi bardy. Olar 60 sharshy metr aýmaqqa taralyp úlgergen jalyndy jedel túrde joıdy. Úılesimdi jumystyń arqasynda órt ózge aýmaqqa taralmady.
Mamandar anyqtaǵandaı, órttiń shyǵýyna kádimgi dala qusy sebepker bolǵan. Qus jol boıyndaǵy elektr jelisine qonǵan bolýy kerek. Elektr kerneýiniń saldarynan qus órtenip, jerge qulaǵan. Jol boıyndaǵy qurǵap turǵan qalyń shóp lap ete qalǵan. Ádette elektr togymen janasqanda qustardyń qaýyrsyndary tez tutanady»,-dep habarlady óńirlik tótenshe jaǵdaılar departamentinen.
Eske sala keteıik, Baıanaýylda jer órtenip, bir aýyldyń turǵyndary qaýipsiz aýmaqqa kóshirildi.
Arada eki táýlik ótkende Pavlodar oblysyndaǵy tabıǵı órt sóndirildi.
