Pavlodarda ekologııalyq problemalar qalaı sheshilip jatyr
ASTANA. KAZINFORM – Pavlodar oblysynyń ákimi Asaıyn Baıhanov óndiris oryndarynyń qorshaǵan ortaǵa zalalyn aıta kele, máseleniń qalaı sheshilip jatqanyn aıtyp berdi.
«Ónerkásiptiń ósýi óńirdegi ekologııalyq jaǵdaıǵa qysym jasaıtynyn jaqsy bilemiz, sondyqtan óńirdi ındýstrııalandyrý serpinin saqtaı otyryp, shyǵaryndylardy kezeń-kezeńimen azaıtý mindetin qoıdyq. Buny qalaı iske asyrýdamyz? Barlyq iri kásiporynda keshendi ekologııalyq sheshimderdi engizý, sondaı-aq salynyp jatqan nemese salynýdy josparlap otyrǵan zaýyttarda sońǵy ecofriendly tehnologııalaryn qoldanýdy talap etý arqyly qol jetkizýdemiz», - dedi Asaıyn Baıhanov Ortalyq kommýnıkatsııalar qyzmeti alańynda ótken baspasóz máslıhatynda.
Óńir basshysy usynǵan derekterge súıensek, quny 178 mlrd teńge bolatyn keshendi ekologııalyq sheshimder ERG tobynyń 4 iri kásipornynda engizilip jatyr. Bul shyǵaryndylardy 50 myń tonnaǵa nemese 57 paıyzǵa tómendetýge múmkindik beredi.
Odan bólek, 2025 jyldan 2027 jylǵa deıin Pavlodar munaı-hımııa zaýytynda, óńirdiń úsh jylý energetıkalyq ortalyǵynda, Ekibastuz GRES-1 jáne GRES-2-de keshendi ekologııalyq sheshimder qoldanylady.
«Qorshaǵan ortany qorǵaýdaǵy mańyzdy baǵyttardyń biri - kommýnaldyq qaldyqtardy basqarý jumysy. Bul baǵytta plastık, metall, qaǵaz jáne shyny shyǵaratyn «Alǵashqy zamanaýı qoqys suryptaý kesheni» qurylysy kómektesedi. Búginde joba ınvestory barlyq qajetti jumysty júrgizdi, ıaǵnı jobalaý-smetalyq qujattama daıyndaldy. Sol sııaqty «Jasyl Damý» operatorynan oń saraptama alyndy, qarjylandyrý boıynsha «Báıterek» holdıngi ony aldyn ala maquldady. Zaýyt qurylysynyń bastalýy 2025 jyly sáýirge kózdelgen, jyldyń sońyna deıin iske qosý josparlanyp otyr», - deıdi A. Baıhanov brıfıng barysynda.
Osyǵan deıin 2025 jyly Pavlodar oblysynda «Aqyldy qala» jobasy iske qosylatyny týraly habarladyq.