Pavlodarda ekinshi aımaqaralyq IT-forým ótip jatyr
PAVLODAR. QazAqparat - Pavlodarda Innovatsııalyq Eýrazııa Ýnıversıtetinde otandyq jáne reseılik kompanııalardyń qatysýymen «IT tehnologııalar - ekonomıkany tehnologııalyq jańǵyrtý negizderi» atty ekinshi aımaqaralyq forým ótýde, dep habarlaıdy pavlodarnews.kz.
Alqaly jıynda InEÝ rektory Marat Baıandın keler jyly forýmdy halyqaralyq deńgeıge kóterýdi josparlap jatqanyn aıtty.
«Bul turaqty forým, - dedi Marat Baıandın. - Elimizdiń ár óńirinen jáne Reseıden qatysýshylar bar. Ótken jyly forýmda ІT tehnologııalardy engizý úshin kadr jetispeıtindigin anyqtaǵan edik. Sondyqtan bilim ordalary mamandardy qalaı daıyndaý kerektigin, ol maman qandaı bolý kerek ekenin talqylaımyz. Buǵan qosa, halyq úshin mańyzdy ІT tehnologııa salasyndaǵy «Smart city» (aqyldy qala) jobasy týraly sóz bolady».
Ýnıversıtet basshysynyń aıtýynsha, shara barysynda birqatar daıyn jobalar tanystyrylmaq. - Byltyrǵy forým aıasynda ótken olımpıadanyń jeńimpazdary óz jobalaryn kórsetedi, - deıdi rektor. - Olar adamdar úshin jaqyn jerdegi valıýta aıyrbastaý pýnktin kórsetetin mobıldi baǵdarlama jasady. Eń qysqa qashyqtyqtaǵy tıimdi baǵamen valıýtany aýystyryp beretin oryndy anyqtaıdy. Odan bólek, ýnıversıtetimizdiń tapsyrysymen jasalǵan «grant kalkýlıatory» jobasy usynylady. Saıtymyzda ornalasqan baǵdarlamaǵa talapker qandaı mamandyq tańdaǵysy keletinin engizse, ol úshin tańdaý kerek pánderdi tizip beredi. Osylar syndy birqatar jobalar forým barysynda kórermen nazaryna usynylady. Sonymen qatar, InEÝ-degi óńirlik ǵylymı-tehnologııalyq ortalyǵy «aqyldy mektep» jobasyn tanystyrady. Joba oqýshynyń mektepke kirgenin, avtobýsqa otyrǵanyn, jol aqysyn tólegenin jáne ashanadan ne alǵanyn kórsetip otyrady. Ata-analardyń óz balasyn baqylaýǵa múmkindik beredi.
Forýmda bıylǵy jyldan bastap InEÝ negizin qalaýshylardyń biri, fızık-matematık Qajyken Qaıdarovtyń atyna berilgen robot tehnıkasy olımpıadasynyń jeńimpazdary marapattaldy. Aıta ketelik, sharaǵa ombylyq «IT-klaster Sıbırı» kompanııasy jáne otandyq «KazRobotıks» sporttyq jáne bilim berý robot tehnıkasynyń Qazaqstandyq federatsııasy» respýblıkalyq qoǵamdyq birlestigi, sonymen qatar kompıýterlik tehnıka shyǵarý boıynsha álemdik kóshbasshylar: «Huawei Technologies Kazakhstan», «Siemens», «Xiaomi», «Hewlett Packard» ókilderi qatysýda.
