Pavlodarda eki júk kóligi men bir jeńil avtokólik soqtyǵysty
PAVLODAR. QazAqparat – Pavlodarda soqtyǵysqan jeńil mashına men júk kóligi órtenip ketti, dep habarlaıdy QazAqparat Pavlodarnews.kz-ke silteme jasap.
Pavlodar oblystyq tótenshe jaǵdaılar departamentiniń málimetinshe, búgin saǵat 17:57-de Ýspen kópiri aımaǵynda órt shyqqan.
- Eki júk kóligi men bir jeńil avtokóliktiń soqtyǵysýy saldarynan Mercedes júk kóliginiń kabınasy tolyq, Volvo-nyń kabınasy túgeldeı, al tirkemesi jartylaı janyp ketti, - delingen habarlamada.
Jalpy aýdany 40 sharshy metr bolatyn 10 dana kabeldik katýshkalar órtendi. Sonymen qatar, 30 sharshy metr aýmaqqa janar-jaǵarmaı tógilgen.
Oqys oqıǵa saldarynan 1974 jyly týǵan Volvo júk kóliginiń júrgizýshisin jedel járdem brıgadasy Pavlodar qalalyq №1 aýrýhanasyna jetkizdi.
Al apat saldarynan shyqqan órtti mamandar saǵat 18:32 aýyzdyqtady.
Qazirgi tańda jol kólik oqıǵasynyń sebebi men keltirilgen shyǵyn kólemi anyqtalýda. Oqys oqıǵa oryn alǵan jerde oblystyq tótenshe jaǵdaılar departamentiniń 3 tehnıkasy men 18 adam jumys istedi.
