Pavlodarda eki birdeı sport nysany paıdalanýǵa berildi

PAVLODAR. QazAqparat - Táýelsizdik kúnine oraı Pavlodar oblysynyń sport qaýymdastyǵy kópten kútken qýanyshqa keneldi – «Sport sıtı» shaǵyn aýdanynda jańa muz-syrǵanaý arenasy ashylsa, oblys ortalyǵynda «Jenimpaz» ústel tennısi ortalyǵy resmı túrde iske qosyldy, dep habarlaıdy QazAqparat.

«Sport Sıtıdegi» jańa muz arenasynyń aıdynyn birinshi bolyp №1 balalar-jasóspirimder sport mektebiniń tárbıelenýshileri synaqtan ótkizdi.

On bir jasar balalardyń oıynyn Pavlodar oblysynyń ákimi Ábilqaıyr Sqaqov ta tamashalap, óńirde buqaralyq sportty damytý boıynsha jumys jalǵasatynyna sendirdi.

- Bul jobanyń oryndalýyn oblystyń barlyq sport qoǵamdastyǵy kópten kútken edi, óıtkeni «Astana» muz saraıynyń arenasy jetkiliksiz edi, - dep atap ótti aımaq basshysy. - Endi balalardyń kóbi sporttyq ınfraqurylymǵa qol jetkize alady. Jaqynda biz sportshylar men jattyqtyrýshylardyń basyn qosyp, Pavlodar sportynyń respýblıkalyq jáne halyqaralyq deńgeıdegi pozıtsııasyn kúsheıtý maqsatynda buqaralyq sportty damytý baǵdarlamasyn talqylaımyz dep oılaımyn. Barshańyzdy Táýelsizdik kúnimen quttyqtaımyn!

Sport nysany eń zamanaýı tehnologııalyq jabdyqtarmen jabdyqtalǵan.

Qazaqstandyq IT-mamandardyń jobasynyń arqasynda arena qyzmetkerleri ony qashyqtan basqarýǵa múmkindik aldy.

Qysqy sport túrlerin damytýǵa at salysqan pavlodarlyqtar jańa arenanyń sapasyna baǵa berdi.

- Qysqy sport túrlerimen aınalysatyn barlyq balalar men olardyń ata-analarynyń atynan osyndaı keremet sporttyq ǵımarat úshin rahmet aıtqym keledi, - dedi Naganodaǵy 1998 jylǵy Olımpıadanyń qola júldegeri Lıýdmıla Prokasheva. - Shynynda da, biz jańa muzaıdyndy ashýdy kópten suradyq. Pavlodarlyq «qysqy saıabaqtardyń» múmkindikteri keńeıip kele jatqanyna biz óte qýanyshtymyz. Bul biz úshin óte mańyzdy.

Pavlodarlyq ústel tennısiniń áýesqoılary da Táýelsizdiktiń 30 jyldyǵyna oraı syılyqqa ıe boldy.

«Baıantaý» sport keshenine jaqyn jerde «Jenimpaz» mamandandyrylǵan ortalyǵy resmı túrde ashyldy.

Ol 15 ústelge shaqtalǵan jáne qazirdiń ózinde №2 balalar men jasóspirimder sport mektebiniń tárbıelenýshilerin, sondaı-aq jan basyna qarjylandyrý baǵdarlamasy boıynsha pıng-pongpen aınalysatyn balalardy qabyldaı bastady.

- Memlekettik baǵdarlama boıynsha ortalyqta tórt jattyqtyrýshy jumys isteıdi, olar 150 balany oqytady, - dedi jattyqtyrýshy Dáýlet Ysqaqov. – Bizge zamanaýı jabdyqtar men sport quraldary berildi. Munda oınaýdyń ózi rahat! Eger jumysty durys jelige qoısaq, «Jenimpaz»-dyń ózinde ǵana ústel tennısimen 800-den 1000-ǵa deıin bala aınalysa alady.

Táýelsizdik kúni jańa sport alańynda ústel tennısinen Pavlodar kýbogy ótti. Oǵan 70 sportshy qatysty.

Sýretterdi túsirgen Valerıı Býgaev