Pavlodarda eki aptada 849 adam koronavırýs juqtyrdy

PAVLODAR. QazAqparat - Oblys ákimdiginde óńirdiń aǵymdaǵy epıdemıologııalyq jaǵdaıy talqylandy. Bul jaıynda óńir ákimdiginiń baspasóz qyzmetinen málim boldy, dep habarlaıdy QazAqparat.

Densaýlyq saqtaý basqarmasynyń basshysy Aıdar Seıitqazınovtyń habarlaýynsha, 2021 jyldyń basynan beri Pavlodar oblysynda koronavırýs ınfektsııasynyń 849 jaǵdaıy tirkeldi.

Orta eseppen naýqastardyń kún saıynǵy ósimi - 0,8%. Infektsııalyq tósek-oryn júktemesi – 34,3%.

- Óńirde 169 mobıldi brıgada jumys isteıdi, qańtardyń birinshi onkúndiginde olar 3283 shaqyrýǵa qyzmet kórsetti. Onyń ishinde JRVI – 65,9%, pnevmonııa – 2,8%, koronavırýs – 25,3%, basqa shaqyrýlar - 6%. Biz dıspanserlik esepte turǵan patsıentterdi erekshe baqylaýǵa aldyq, bul - 130 myńnan astam adam, - dep habarlady Aıdar Seıitqazınov.

Sultanov atyndaǵy oblystyq klınıkalyq aýrýhana bazasynda KVI-ge qarsy vaktsınanyń 8000 dozasy syıatyn muzdatqyshtar daıyndaldy.

Sonymen qatar óńirdiń basqa da medıtsınalyq uıymdarynda 22 arnaıy tońazytqysh ornatylady.

Vaktsınanyń alǵashqy partııasy óńirge aqpan aıynyń sońynda keledi dep josparlanyp otyr.

Kezdesýde sanıtarlyq dárigerlerdiń talaptaryn saqtaýdy baqylaıtyn monıtorıngtik toptardyń jumysy da talqylandy.

2021 jyldyń alǵashqy 13 kúninde mamandar 2389 nysan boıynsha 235 reıd júrgizdi, olardyń úsheýinde talapty buzý faktisi anyqtaldy.

Óńir basshysy monıtorıngtik toptardyń jumysyna taldaý jasap, olardy epıdemııalyq oshaqtyń paıda bolý qaýpi bar jerlerge baǵyttaýdy talap etti.

- Monıtorıng toptarynyń tıimdiligi óte tómen. Bir jarym aı buryn olardyń sanyn kóbeıtý týraly sheshim qabyldanǵan kezde bul sapaǵa zııanyn tıgizbeýi kerek dep birden kelisken bolatynbyz. Shekteý sharalaryn jeńildetý barlyq nysandarda, sonyń ishinde jeke nysandarda epıdemıologııalyq rejımdi tolyq saqtaý shartymen jasalǵanyn este ustaǵan jón, - dedi óńir basshysy.

Pavlodar oblysynda úshinshi oqý toqsanynyń qalaı bastalǵany týraly bilim basqarmasynyń basshysy Dinıslam Bolathanuly aıtyp berdi.

Oqýshylar sany 300-ge deıingi 230 mektepte jumys dástúrli formatta bastaldy. 300-den astam tárbıelenýshi bar taǵy 126 oqý ornynda oqytý qashyqtan ótedi.

Bul mektepterdiń tómengi synyp oqýshylary úshin 2357 kezekshi synyp jumys isteıdi. 11 synyp oqýshylary úshin aralas oqytý qarastyrylǵan: negizgi jáne qorytyndy attestattaý men UBT-ǵa shyǵarylatyn pánderdiń 70% dástúrli formatta, al 30% qashyqtan oqytylady.

Ábilqaıyr Sqaqov bilim basqarmasyna balalar men pedagogtar arasynda juqtyrýdyń aldyn alý boıynsha jumys isteýdi tapsyrdy.