Pavlodarda eki jaǵajaıǵa qoıylǵan shekteýler alyndy
ASTANA. KAZINFORM — Shańdaqsor men Maraldy kólderine kirý qaıta tegin boldy, dep habarlaıdy Pavlodar oblysy prokýratýrasynyń baspasóz qyzmeti.
Tabıǵat qorǵaý prokýratýrasy azamattardyń ótinishteri boıynsha jaǵajaılardy uıymdastyrý kezindegi zańdylyqtyń jaı-kúıine taldaý júrgizdi.
Ekibastuz qalasynyń Solnechnyı kentindegi Shańdaqsor kólinde jáne Sharbaqty aýdanyndaǵy Maraldy kólinde sý zańnamasy talaptaryn óreskel buzý faktileri anyqtaldy. Atap aıtqanda, Sý kodeksiniń 17-babyn buza otyryp, jaǵajaılardy uıymdastyrýshylar qorshaýlardy, kúzet pýnktterin jáne aýmaqqa kirý aqysyn belgileý arqyly halyqtyń jalpy paıdalanylatyn sý obektilerine qoljetimdiligin shektedi.
Jekelegen jaǵdaılarda balalar jaǵajaıy jabdyǵynyń jáne kezekshi medıtsına qyzmetkerleri, qajetti quraldar men dári-dármekter bar alǵashqy medıtsınalyq kómek kórsetýge arnalǵan úı-jaılardyń bolmaýynan kórsetilgen sý qoımalaryndaǵy qaýipsizdik qaǵıdalaryn buzý faktileri anyqtaldy.
Tabıǵat qorǵaý prokýratýrasy anyqtalǵan faktiler boıynsha ýákiletti organdarǵa qadaǵalaý aktilerin engizdi.
— Qadaǵalaý sharalary boıynsha Shańdaqsor jáne Maraldy kólderiniń jaǵajaılarynyń aýmaǵyna aqyly kirý joıyldy, azamattardyń ortaq sý paıdalaný obektilerine erkin qol jetkizý quqyqtary qalpyna keltirildi, qajetti qural-jabdyqtar qamtamasyz etildi, kináli tulǵalar ákimshilik jáne tártiptik jazaǵa tartyldy, — delingen habarlamada.
Buǵan deıin Pavlodarda 45 jaǵajaıdyń 7-ýinde ǵana balalarǵa arnalǵan aımaqtar jabdyqtalǵanyn jazǵan edik.
