Pavlodarǵa taǵy da jańa tramvaı jetkizildi
PAVLODAR. KAZINFORM — Bul Belarýs elinen ákelingen altynshy tramvaı. Jaqyn kúnderi taǵy bir vagonnyń kelýi kútilip otyr.
Oblys ortalyǵyndaǵy tramvaı vagondaryn jańartý jalǵasa túsýde. Qaladaǵy tramvaı parkine Belarýs elinen taǵy bir jańa vagon jetkizildi.
— Osymen jańadan altynshy vagon alynyp otyr. Jaqyn kúnderi taǵy bir vagonnyń kelýi kútilýde. Osylaısha, eýropalyq sapadaǵy zamanaýı tramvaılardyń alǵashqy ondyǵyna senimdi túrde jaqyndap kelemiz. Qala turǵyndarynyń jol júrýin budan da jaıly ári yńǵaıly etý úshin jyljymaly quramdy kezeń-kezeńimen jańartyp jatyrmyz. Qazirgi kúni bes jańa vagon qala kóshelerinde kún saıyn qatynap, myńdaǵan jolaýshylardy tasymaldaýda, — dep habarlady D. D. Mahmýdov atyndaǵy Pavlodar qalasynyń tramvaı basqarmasynan.
Buǵan deıin oblys ortalyǵynda Belarýs elinde jasalǵan 4 jańa vagonnyń tanystyrylymy ótken edi.
